Telangzüba Kaket – T.Ken 119:129-136

Nai mangatetba ammang aser anüng akongba ajangshia arua lir asü? Anogo karbo kanga jangramatem süidaktsür. Ken ken asenoki ammang ajanga süir aser Tsüngremer lima nung kechi ataloker ta süngmanger. Mesüra asenoki yasa tzüraba ajurur- tanelaren asenok takong, ayar aser tzürar.
Mangateti alir dang telangzüba kechi agütsür? Tsüngrem O. “Ne temelaba ozüngtem tesüngmangtsü lir, aji asü nung ni itemji benshitsü” (t.129). Kodang asenoki Laishibaji züngdir aser tashi angadir takümji memetetba taküm ka masütsü. Iba yagi atamata takümji tesüngmangtsü taküm kümdaktsür. Kodang asenok tekolok aser temulungjang Laishiba agi sünga lidir, asenoki anguba ajak balaka asütsü.
Ammang nung telangzüba kechi? “Ne o tem lapokba agi tesangwa agütsür, iba yagi tongmelang purtem nem tangatetba agütsür” (t.130). Lapokba tetezü aitdaktsüba, Tsüngremer O lapokba. Tsüngremi asenok dang rasa ashidang asenok sangwadaktsür aser peladaktsür. Tanü nai ammang ajurura, ne Laishiba züngang aser iba jagi ne nem tesangwa agütsütsü. Tzüraa alirtem dang telangzüba kechi? Ken ken asenoki kecha maka ama bilemer aser nüngdak adoker. “Ni tangu sadema tebang kaar ali, kechiyong ni ne temelabatem yongyaa ataa ali” (t.131). Tsüngrem O ji mopung temerük ama lir. Kodang asenok tzüradir tzüratemdaktsür aser asenok ayadang ibai chiyongtsü ama lir.
Nai takong, ammang, mesüra mangatetba kodang ajurudir Tsüngrem O dangi meyipang. Iba ochi jagi ne tanela sangwatsütsü aser iba tenangzükbatemi na tasü itdaktsütsü. Ne nüngdak peridaktsütsü asoshi Tsüngremi Laishibaji asameyang. Anungji kodang tasü maittsü anogotem arudir, ne kolok aser ne temulungjang o jagi mesüang.