Telatetba angutsü atema olemteptsü aser nisungtemi tamang katettsüsa inyaktsü

Kohima, June 3 (TYO) : Naga yimten ken o koktettsü atema inyakba mapa nung Centre sorkari olemtep aser nisung ajak tamang kahdaktsütsü atema inyaktsü merangtsü, ta Union Minister for Law & Justice, D V Sadananda Gowda-i ashi.

“Naga yimten ken o ajaki agizüktettsüsa telemtetba ka agitettsü atema olemtep nüngdaker. Iba khuret ya tang tasen masü saka Atal Behari Vajpayee-i aniba taoba BJP sorkari olemtep tenzük saka Congress-i küm 10 yimsü asüdang mokonga kümdaktsü,” ta Sadananda Gowda-i osangbener den sensaksemdang ashi.

Tesüiba mapang Centre-i tenangzükbatem ama mapa meinyak anungji Framework Agreement-ia kasa tia ajurutsü akok ta nübortemi arentaka bilemer saka ibaji mataloktsü, ta paisa shisem.

Union Minister-isa Nagaland atema High Court balaka lapoktsüba aser Centre o State sorkar tsüngda Oil & Natural Gas atema mangatettep aliba onüktem tekaritiba nung angatetteptsü ta metetdaktsü.

Gowda-isa ashiba agi, Modi’er sorkari 2015-20 State Disaster Response Fund atema sen crore 54 lemzüktsüogo aser iba nungi sen crore 14.44 state nem agütsüogo.

Paisa, Indo-Bangladesh arrtsü indang onük jembidang, taküm December ita matemdangsa atsü atsübangtsü aser nisung ka danga ozüng alema linük telungi maitdaktsütsü, ta ashi.