Telecom ministry-i ‘Freedom 251’ mapa makümtsü amai bilemer

New Delhi, February 20 (Agencies) : Alima nung smartphone rongnung sen dalangtiba ta sangdongba ‘Freedom 251’ ya koba tashi ka takok angutsü-ar ibaji telung nung kanga junga asadangba sülen Telecom ministry-i, iba amala smartphone ya sen sen 2,300 mesüra 2,400 dang nungi tajemba agi mayoktsüla, ta ashiba osang kar ajanga metetdaktsü.
“Iba smartphone sayaba nü nungi tenzüka telecom ministry-i telung nung kanga asadangogo. Iba mapang ketdangsertemi iba mesükba phone ya sen 2,300-2,400 tashi agibo ayoktsüla ta ngutet,” ta office sangdong ka ajanga IANS dang ashi.
Alima nung sen dalangtiba “Make in India” smartphone ayoktsü nangzükba, Noida nung amenoka aliba Ringing Bells company-i, iba phone jilia mangatsü asoshi website lapoktsüba sülen ananü tsüngda nung nisung crore pongu shi-i iba phone mangaogo, ta Hokolbarnü metetdaktsü.
Ringing Bells nung Tir Ashok Chadha-i, company-i online ajanga mangar nisung lakh 25 nem “Freedom 251” smartphone tongtsütsü anungji February 21 nikong 8:00 ako tashi jilia mangatsü lapoktsüba website ji shibangtsü aser meshibangtsü-ar terata ka nung lir, ta ashi.
Ringing Bells-i, Bodhbarnü “Freedom 251” sayaba ajanga alima nung alir ajak aoksatepogo aser iba phone yangluba nung sorkari kanga nungita yariogo, ta ashi.
Iba smartphone nung tanga app aika enokja aliba den Swachh Bharat, Women Safety, WhatsApp, Facebook aser Twitter dena mezüngi enokja lir.