Telecommunication Union-i 5G tenzüktsü nükla ayur

Geneva, October 30 (Agencies): Tarutsü mapang mobile ajanga teti tesem ajak nung tsüngpret ama kara internet service amshitettsü aser tonteprateptettsü atema, International Telecommunication Union (ITU)-i Brihostibar nü 5G mobile tenzüktsü asoshi nükla tasen ka yuogo.

ITU indang Radiocommunication Assembly ajanga lemtetba “IMT-2020” teinyaktsü nung 5G inyakyim, nükjidong aser iba ya mapa akümtsü asoshi mapa tasazük ajak lemteta renema yuogo, ta Xinhua osang ajanga ashi.

5G amshitsü asoshi radio systems tem nung technical inyakyim renloka yanglutsü asoshi linük aser yimti balala nung aliba lokti aser company tem den lokteper ITU-i ataktettsüba mapang tashi nung renemtsü sentong lir.

“Tang ITU indang nükla tasenba ‘ITU-R’ ajanga tarutsü atema 5G mobile technologies renlokba tsütsü sabang sadema lapoktsür,” ta ITU Secretary-General Houlin Zhao-i ashi.

Mobile communication melenshiba aser inlokba aika ajangshia aruogo saka alima melenshiba yari nüburtemi apps tasen, data timba aser nüngdakba tapu ajak keta aliba oset aginüba dak ajemdaker iba nükjidong tasen ayurba lir.