Telemsa adokdaktsürtem kechiba sorkari mazüokteter: Azad

New Delhi, March 20 (Agencies): Deobarnü Congress-i, Narendra Modi’er sorkari  Sangh Parivar  den densemba tentettemi tamangba lokti tsüngda tesempa aser mokokachi prokba mazüokteter, ta tai tongloktsüogo.
Iba dak sentakba nung Senior Congress lenir, Ghulam Nabi Azad-i shidi ka ajanga Ato kilonser, Narendra Modi dang linük nung minority anema inyakba tatalokbatem metetdaktsü, item rongnung tawa Jharkhand, Latehar district nung Muslim nunger shiruru shishilembar ana reshikangshiba sülen süngdong nung lisü agi alenseta südaktsüba densema metetdaktsü.
Rajya Sabha nung opposition lenir Azad-i, “Tejashi nung ni iba ya reprangtetba jembitsüsa akumer, ozüng agi yimsüsüba aser democracy aliba ajanga kanga akhümtsübuba linük, India nung item ama taochi maket tatalokbatem ya alima linüktemi  tenük yokdar,” ta ashi.
Centre nung BJP sorkar tashii aruba sülen amokmeren, rara aser kar anema inyaktepba ya kanga tia maka, ta pai ashi.
“Majority tangatetba benoker aser metetsümonga ibaju ajungkettsür. Iba ya ajanga democracy, lokti balala tesünep aser yimjung nung aliba den külemi linük ainba aser terenlok jenjang mejungi kümdaktsür,” ta pai ashi.
“Minister tem, MP tem, MLA tem, tashi nung aliba party lenirtem aser Sangh Parivar nung densemba tentettemi tamangba lokti tsüngda telemsa adokdaktsütsüsa tashishitsü o aketba o maneni jembir,” ta pai ashi.
“Ano mamangtettsü kaji, sorkar tsütsü nungi aser BJP lenirtemi item amaji azüoktsü atema meinyaker. Ibayongji telemsa adokdaktsütsü sentong nung nungji parnok shilem-a lir südi ta melung malemer,” ta paisa ashi.
“Yimtenren nung tajangzük angutsü atema tamangba lokti tsüngda tesempa aser melung melemtep atema kecha meinykaba ajanga linük nübur ajak shisabulur. Memonodangyongi iba ya azüoktsü rongtak nüngdaka kümogo,” ta pai ashi.
Tawa World Culture Festival aser Sufi Conference nung Ato kilonser Modi-i jembiba o dak sentakba nung Azad-i, iba osang alima ajungai angashiogo saka asen linük nung tamangba lokti tsüngda tesempatep aser meleung melemtep atemabo koda (?), ta asüngdang.