Telemtetba anasai arur !

Tang oagi Delhi nung Nagaland nungi yimten yimsüsürtem Speaker aser Chief minister nati anir parnok metsü tashi center sorkar nung tongtibang lenirtem ajurua Naga yimten khuret lemsatepa jajadagi. Parnoki Delhi nung yimten telok balala nung tongti lenirtem dang Naga yimten tebilemtsü ken o ya tatembang küma latettsü asoshi tatar hoho (parliament) nung benokdang akok tashi tepu küma yaridaktsünür ta shia jajadagi, Atangji, kodang Naga yimten tebilemtsü ya tatem küma latettsüsa mapang arudir, idangji tatar hoho nung benoktsü aser teimbai mulungba nung latettsü, anungji yimten telok ajak teyari nüngdaktsü. Aji oda, Nagaland nungi yimsüsürtem oagi Delhi nung tongtibang yimten lenirtem ajurua Naga yimten ken o tatar hoho nung yakta benoka jembitsü amai jembishinüa jajaba jagi Naga yimten jenjang tasen ka latettsüsa mapang anasai arur amai sayur. Asenoki taoba mapangtem nung atalokba mapatem indang bilemdangra, yaküm 2015 küm August ita jakdang Nagaland tatar senden nung yimsüsürtem den Naga nunger lokti tentettem ajak Kohima nung adenshir lokti telongjem senden ka lia, Naga yimten tebilemtsü tatem küma telemtetba kati arutsübaji ajaki mulunger, anungji ajaki meraketa agizüktettsüsa telemtetba ka yaksa agidaktsüner ta lemteter senshi. Iba senden sülen kopi melii August 3 nü oagi Delhi nung India sorkar o NSCN-IM lenirtem na tsüngda Naga yimten tebilemtsü ken o latettsü asoshi tamendakdak ken o kar angatettepa jembiogo ta metetdaktsü. Atangji, iba osangji ajak asoshi meimlaba osang tajung ka liasü saka teratatsükaji iba tangatettep ken o renemba nungji kechi koma ken o ka renema aliar shingaia mejangjatetter. Ajisüaka, shingaia Naga yimten tebilemtsü ya tepdaka meyuner asünungji, terenemba ken o mangu aser mejangjaaka pelashishia agizükogo. Iba sülen tang Nagaland nungi yimsüsür ajunga amato par 20 oagi center nung yimten lenirtem ajurua Naga yimten latettsü asoshi tatar hoho nung ken o tajung jembidaktsünüa sensaksema jajaba jagi ano yakta Naga yimten nung tatalokba ka alitsü amai sayur. Iba atemaji Naga nunger ajak tangatetba tajung nung renema atatsü nüngdaker. Ajisüaka, ano teratatsükaji Naga yimten tebilemtsü ken o tatembang küma renemtsüba onüktemji kechi komaka renemdar ta metetnüba aser teyongyaba mapangba ya asütsü. Ashiko, Nagaland nungi oa Delhi nung Naga yimten ken o jembia senzür yimten yimsüsürtem jagia item shitakba tagitsü onüktemjibo memetetiang alitsüa akok. Ibaji parnok asoshi tebilemtsü tuluka asütsü. Aji oda, ajaki telemtetba tajung ka aginer, saka ajakibo ken o lemtetdak shilem agitsü makok, anungji nisungtem mulungjang terata agi sünga lir. Kari India telongjem küboksa süaka  Nagaland temzüng aser flag balaka alitsü südi ta jembir, kari “Pan Naga Hoho ‘ ta ser anüng kübok aliba Naga nunger ajak züngsema telongjem ka tentettsü aser iba nemji Naga nunger loktiliba aser sobaliba dak aketba temzüng ozüng yanglua benshitsü tashi agütsütsü aser iba telongjem atema küm shia India sorkari sen lemzüktsütsü ta jembir. Ano, karibo Naga nunger o India nunger sepai na longjemer tangar bendanger kintem tsütsü arrtsü anüktsü tangatettep ken o renemtsü ta jembir. Item ajakji tajung aser takoktsü asütsü. Ajisüaka, Naga nunger asoshi tebilemtsü kaji Delhi nungi renema bener aruba telemtetba ken oji Naga nunger ajak asoshi tagizüktettsü ken o asütsü asü (?) ta asüba tebilemtsüji asütsü. Aji oda,  India tatar hoho nung Naga yimten ken o latettsüba dang nungibo Naga nunger rongnung asenok ajaki agizüktettsüsa ken o lemtettsübajiang tasakba asütsü amai reprangtetter. Aji oda, Nagaland yimten yimsüsürtem asoshi Delhi nungi meyipa arur külenang Kohima nung  teinyaktsü khuret tuluba asütsü. Delhi nungbo ajaki agizük saka Nagaland nungbo ajakibo magizük ta masütsüsa ajaki meranga inyaktsüba mapangji tang lir.