Telok aika asüba tebilemtsü

Tang ya Naga nunger yimten tebilemtsü dang nungibo Naga nunger yimten nüjiso bushirtem telok aika küma lemsar aliba tebilemtsü tuluba lir. Aji oda, India den Naga yimten tebilemtsü tatembang küma latettsüba tebilemtsü khuret dang nungibo Naga nunger telok aika küma lemsar aliba rongnung tangatettep kari arudaktsütsü tebilemtsü khuret tuluba kümogo. Ibayongji, tang NSCN-IM teloki India den tangsa tang Naga yimten tebilemtsü tatem küma latettsü asoshi merangba angudang pelar saka ano külen tanga NSCN aser NNC teloktem India den ken o jembidak madenba indang bilemdang shisabolur. Aji oda, kanga shisabolua bilemba agi, taoba hopta nung asenoki iba osangkaket nung ” India den Naga yimten latettsü asoshi tang amai (tetezü NSCN-IM telok kijai jembiba ama) Naga nunger linük tenzüker telok ka khen, ka khen ta telok shia balala India den ken o lemtepa ao nunga koma süla (?) ” ta asüba tebilemtsü onük nung asenoki shisadangogo. Iba tasüngdangba langzürtem teimbakati telok shia den jembiba agiang tebilemtsü tuluba adoktsü amai langzüogo. Atangji, iba tebilemtsü onük aser mapang ya Naga nungertem asoshi kanga teratatsü tuluka kümogo. Ajisüaka, Naga nungertemi metettsüba kaji Naga lima nung yimjung alitsü mesüra malitsübaji Naga nunger mulung, anungji Naga yimten tebilemtsü latettsübajia Naga nunger mulung asütsüla, kechiyong kechi komaka latetdir latetaka, ibaji Naga nungertem asoshi latetter asütsü. Aji oda, Naga nunger linük tenzüker telok ajak ka kümer India den jembitsübaji tamakoktsüka süra asenoki aginüyonga maginüyonga telok shia denji ka den khen aser ka den khen ta jembitsüsa adoktsü. Iba atemaji tang NSCN-IM telok o India sorkar na tsüngda telemtetba kati marudangsa Naga Hoho teloki anir bilemdanga inyaktsüba khuret tuluka reprangtetter. Aji oda, Naga nunger linük tenzüker teloktem dang Naga nunger tematiba telok kati parnok ajak sabang kati jaoker, Naga nunger ajak ajungtsü aser Naga lima tesünep nung renloka aotsü asoshi India den yimten tangatettep ken o külemi jembia latettsüsa lenmang ka bushiteptsü merang nungbo telok ajaki mulungsua shilem agitsüa akok . Atangji, telok ajak dang tama NSCN-IM teloki India den ken o lemtep tenzükogo, ajisüaka Naga nunger ajaki agizüktettsüsa yimten telemtetba tajung ka teti atema latettettsü mechi nung NSCN-IM teloki khen atatsüla. Ibaji Naga nunger lokti tentettem longjemer inyak nung junger ta bilemer. Iba mapa atemaji ariteptsüla, kechiyong koba telok kati südir süang India den telemtetba ka agiadokra, iba sülenjibo Naga nunger telok ajak longjemer Naga yimten ken o jembitsübaji nüngdak madoktsü. Aji oda, tang ama mapang ya Naga nunger lenirtemi NSCN-IM teloki kechi komaka telemtetba ka bener arudir ta atatsüba mapang masü saka kechikomaka telemtetba arudaktsünüar, iba amaji lemtettsüsa shilem agitsüla. Iba ama terata mapang ka nung Naga nunger kintem dang Ao kini shisa tajung agüja lenitsübaji kanga tongtibang shilem ka asütsü. Aji oda, Ao kin nungi adokba olaji telok balala tenüng nung masü saka Ao Senden tenüng nung asütsüla, anungji Ao Senden lenirtemi maneni nükenbelem arema shisalemsatepa jajatsüla aser Naga nungertem dang rongdak nüngdaka yimten latettsüba len tejangja sayutsüla. Iba jagi dang tarutsü Naga lima aser Naga nungertem azü tokshi lendong tia nungi kümzüktsü.