Telok asem tsüngda senden atsülangba agi UNC mepelar

Imphal, July 22 (Agencies): Manipur nung district tasen asem tentetba onük nung Centre, state aser United Naga Council (UNC) ken o jembitsü mapang atsülangba atema UNC mepelar; telok asem tsüngda senden ya July 22, 2017 nü Senapati district headquarters nung amentsü sentong liasü saka Ministry of Home Affairs (MHA)-i UNC lenirtem dang iba sendenji taruba ita tetenzüklen amentsü mepishiogo, ta osang angazüker.
Osangbener den phone ajanga jembidang MHA Joint Secretary, Satyendra Garg-i, Manipur sorkari Home Ministry dang, senden amentsü anogoji July 22 masü saka July 23 nü amentsü mepishi, ta metetdaktsü.
Garg-i ashiba agi, telok asem tsüngda ken o jembiba nung state nungi shilem agitsü lemzükja aliba cabinet minister temji tang tagidak Manipur Legislative Assembly nung Honibarnü adentsüsa adoker ta state sorkari metetdaktsü.
Telok asem tsüngda senden July 10, 2017 nü Ukhrul nung amentsü sentong liasü, ajisüaka ibaji July 22, 2017 tashi atsülanga liasü, saka tana iba senden magiteti maneni anogo atsülanger.
Iba onük dak sendakba nung UNC Tir, Gaidon Kamei-i Manipur nung alir Naga nungertem dang kechi atalokdir atalokaka ajak renema alitsüla, ta sangdongogo.
Tamalena UNC lenirtemi, state nung district tasen asem tentetba onükji sorkari süoki ia magira parnoki longkak sashia aittsü ta amokmerenogo.