Telok balalai asür Ritika Mehta tepsetba aitsür ; State sorkari nübortem lendong nungi kümzüka meyuteter : NPCC

Dimapur, December 15 (TYO) : Dimapur nung mejangjatetba nisungtemi tetsür shishilemar Ritika Mehta kahsetba kukua aitsür ta NPCC-i sangdong ka nung metetdaktsü.
Dimapur jila tiyongtsü nung nisung tepsetba aser talisa tetsür ka tepsetba inyakyim ajanga Nagaland nung ozüng maliba tensa jungkai adoka sayur. NPF-BJP DAN sorkari sensosangertem taküm kümzüka meyuteter aser parnoki tamakok nguogo. Anungji Chief Minister TR Zeliang-i tim mesüi tentetba “opposition maliba sorkar” alema oa bilemtsüla aser state ketdangsütsü atema tashitait sorkar ka tentettsüla, ta Media Cell, NPCC-i sangdong nung shia lir.
Home Minister Y Patton-ia state nung ozüng maliba tensa atema telangzüba agütsütsüla kechiyong police nübo 1500 talila shimokaka sorkari tensa mazüokteter, ta NPCC-isa metetdaktsü.
Tashimait NPF-BJP DAN sorkar kübok state police den külemi state judiciary nungeri mapa tamajung inyakertem mazüokteter aser iba jagi tetsükdaktsü kecha melii parnoki ozüng alema mapa inyaker. Anungji police aser judiciary natia nübor tsüngdang telangzüba agütsütsü tim.
Police aser judiciary-i tetsübu mesüra talenba kecha melei pei teinyaktsü mapa inyaka otettsü atema tang aliba sorkari parnok sadema inyakdaktsütsüla, ta NPCC sangdong nungsa shia lir.
NPCC-i ola madoki malitsü, anungji state sorkari nübortem dang parnok lir ta sayutsü atema ozüng kübok mapa inyaktsü onoki takhangba agütsür. Ozüng alema mapa inyakba ken o tem timi bushisüngdanger aibelenertem pua merenshitettsü atema sorkari police nem sademsadema inyakdakjang, ta NPCC-isa metetdaktsü.
Dimapur District Citizens Forum (DDCF)-ia sangdong ka ajanga Mrs Ritika Mehta tepsetba inyakyim aitsüogo.
DDCF president Joseph Lemtur-i telok tenüng nung asür Mrs Ritika’er kibong den asüku lemsatepba den Tsüngremi tasür nem anisüngzük agüjang ta sarasademtsüba sangdong nung shia lir.
Ano, Muslim Council working president, A. Rahman-ia sangdong ka nung MCD tenüng nung mang ayimba den nisung tepsetba aitsüba metetdaktsüogo.
Asür Mrs Ritika ji shishilembar la dang masü saka Dimapur aser temeket nung lokti asoshi mapa inyakba nung shilem agia aru aser lai teti nüngdakbapurtem yari, ta MCD sangdong nungsa shia lir.