Telok ka kijai ashiba agi Paris tenangzüktep memelenshitettsü: UN

United Nations, June 2 (Agencies): US tir Donald Trump-i Paris climate tenangzüktep nung temelenshi kar asütsü sangdongba nung United Nations indang Framework Convention on Climate Change-i memulunger.
“Paris Climate Agreement ya linük 190 temai sign asüba otsüsütsü tenangzüktep ka lir aser linük kati ashiba nung ajemdaker dangbo memelenshitettsü” ta Framework Convention on Climate Change-i metetdaktsü.
UNFCCC ketdangsüba kübok Paris agreement ya agi aser parnoki ashiba agi, US tir Donald Trump-i Paris Climate Change Agreement nung par linük madentsü sangoktsüba atema sasa bilemer.
White House nung aliba Rose Garden nung Trump-i, par sorkari Paris Accord nung temelenshi kar asütsü mesüra United States atema tim ta asüba telatetbaba tasentem agitsü, ta metetdaktsü.
“Paris Agreement nung linük 194-i sign süogo aser linük 147-i mulunga agizükogo. Anungji, telok ka kijai ashiba nung ajemdaker temelenshi mesütettsü” ta UNFCCC Secretariat-i sangdong ka nung metetdaktsü.
Iba onük atema United States sorkar den jembishinütsü mulunga lir, ta parnokisa ashi.
“Paris Agreement-i alima nung rongsenkettsüng aser takümtem jenjang tajungba kümdaktsü atema tamendakdak ka yanglur. Iba ajanga alima tali azükarutsü, lendong nungi jenbua alitsü aser wazüka ayutsü. Linük ajaki mulunga tenangzüktep agi aser iba nung shishilembar, yimtitem, linük aser sensotemi pusema nungiter” ta NFCCC-isa metetdaktsü.
December 2015 nung UN Framework Convention on Climate Change (UNFCCC)-i ketdangsüa agiba COP21 mungdang nung Paris tenangzüktep agi.
Iba tenangzüktep ajanga linüktemi alima nung climate change aser global temperature 2 degrees Celsius tashi ajema kümdaktsütsü atema alizüng yua lir.