Telok toktsür aoertem tanaben arua adentsüla: NNPGs

Dimapur, October 6 (TYO): Naga National Political Groups(NNPGs) trok indang Working Committee (WC)-i May 13, 2017 sülen NNPGs 6 kübok civil aser military züngsemtemi telok toktsür aoba, anogo tenet tsüngda pei Naga National Political Group nung tanaben adentsü atema tetuyuba agütsüogo.
NNPGs sasep nung züngsemtemi telok toktsütepba mapa anentsü aser May 13, 2017 o September 19, 2017 anogotem telemtetba agibatem nangzükshia WC-i iba tetuyuba agütsür, ta Media Cell sangdong ka nung ashi.
Iba osang sangdongba sülen anogo 7 tsüngda telok toktsür aoertemi pei pei telok nung tanaben züngsemtsü atema tuyur, ta sangdong nungsa metetdaktsü.
Iba tetuyuba sülen manidakba civil mesüra military worker dak NNPGs indang Working Committee-i tapet temerenshi agütsütsü, ta Media Cell sangdong nungsa ashi.
NNPGs troki putepshiba aser telongjem indang tangatetba nung ammeter aser tanü Naga putiotsü nung kanga dang tongtipang mapang ka nung, telok ka toktsür ka nung oa adenba anema telemtetba takang agir aser inyakyimtem metongshir. Iba mapa nung kin Hoho tem aser civil society temia NNPGs den yariteptsü mepishir, ta Working Committee-i sangdong nung metetdaktsü.