Teloktep ajaki NDA toktsütsü: Shiv Sena

Mumbai, Metsüremi 08 (Agencies): Andhra Pradesh state nem maongka balaka magutsüba atema N Chandrababu Naidu-i aniba TDP-i Ato kilonser, Narendra Modi’er sorkar nungi par party nungi minister tem agientsü telemtetba agiba sülen BJP den teloktep party, Shiv Sena-i BJP aitsüogo.
Uddhav Thackeray-i aniba party, Shiv Sena nung lenir tain, Sanjay Raut-i, ”Yamai ataloktsü, ta Shiv Sena-i imlaa liasü. Tanga party temia NDA toktsüogo,” ta ashi.
BJP-i par teloktep party tem akhüm metsübur, ta aija Raut-i, ”Joko teloktep party temi BJP den tesendaktep tajung mayur. Tejashi ajanga tatemsabo teloktep party ajaki iba teloktep (NDA) toktsütsü,” ta ashi.
Ano Shiv Sena MP, Arvind Sawant-ia, “BJP-i par teloktep party tem akhüm metsübur. TDP-i tang ang ibaji meteter. Onokibo ibaji mapang talangka nungi jembia arudar. BJP-i ‘ajak dendaktsüba’ indang jembir, ajisüaka mapatong telemtetba agidangbo ajak medendaktsür. Parnoki ajak den jembir ang ajaki melungtepa telemtetba agitsüla, ajisüaka parnoki yamaji meinyaker,” ta ashi.
Ano tanga osang ka nung, Congress-ia TDP nungita Andhra Pradesh nem maongka balaka agutsütsü atema takhangba agutsü.
Congress nungi Rajya Sabha MP, Renuka Chaudhary-i, “Teloktep ta ajaba party (BJP)-i parnoki nangzükba ama meinyaker. Yamaji ataloktsü ta bilema liasü. Item nisungtem yagi kodanga par teloktep atema menokdaktsü. Tangbo parnoki (TDP) parnok (BJP) jakla nguogo,” ta ashi.
Andhra Pradesh state nem Special Category Status magutsüba anema N Chandrababu Naidu-i aniba party-i par minister tem agientsü atema telemtetba agi.
Yasüng TDP tongti lenir aser Andhra Pradesh Chief Minister, N Chandrababu Naidu-i, TDP nungi minister ana – P Ashok Gajapathi Raju (Civil Aviation) aser YS Chowdary (Minister of State for Science & Technology) nati asüng (Yangtepnü) minister menden nungi sodi meshitsü, ta sangdonga liasü.
NDA teloktep nung BJP sülenbo TDP ya second-largest party lir. Lok Sabha nung TDP züngsem 16 aser Rajya Sabha nung züngsem trok lir.