Teloktep Arab mitkar tayimtsütemi Yemen nung 55 tepset

Saudi Arabia-i aniba teloktep Arab mitkartemi par tayimtsü amshia Yemen kübok Taiz nung bomb tsükdaka tanü Honibar amakba sülen lendong atalokdak mokozü kanga sashia adokba noksa nung angur. (Taiz, July 25)

Sanaa, July 25 (Agencies): Saudi Arabia-i aniba teloktep Arab mitkar tayimtsütemi Yemen kübok Taiz nung bomb-tem tsükdakja tanü Honibar nü amakba osang ka Yemen sorkar anemer telok, Houthi-i ketdang asüba Saba osangi metetdaktsüogo.
Tanü amakba lendong nung ishiba agi nisung 55 tepsetba aser nisung 10 dak tema yirutsüba osang tang tashi nung jangjaogo ta osangi ashi.
Tang pei linük toktsür Saudi Arabia nung jenoka alisang, Yemen Tir, Abd-Rabbu Mansour Hadi tanaben yimsüsütsü menden nung mendaktsütsü nükjidong nung Saudi-i aniba teloktep Arab mitkartemi par tayimtsü amshia Houthi teloki Yemen nung tentetba teseptem taküm March ita nungi tenzüka mapang shia amakba osang bushiteta lir.
Osangisa ashiba agi, tanü amakba maparenji power station nung inyakba engineer aser mapa inyakertem alidak, Mokha nung inyaka liasü.
“Tanü lendong nung yirurtem tang mozükidang anepaludar saka parnok aika kanga mejungi aliba yong tan lendong nung asürtemji tang jangjaba den timba akümtsü akok,” ta osangi ashi.
Tir Hadi pusemba sorkar mitkartemi Houthi telok Aden yimti aser Aden temeket tesemtem nungi tan July ita tetenzüklen makdokba yong teloktep Arab mitkartemi Houthi telok madak takok tulu ngua par amakba maparen inyaktsü tenzükba osanga bushitetogo.
Yemen mitkartemi Houthi telok Aden yimti nungi madokba jakdangbo, Yemen nung alir nisung million 13 shi nem nungdakba chiyongtsü aser mozü mora tongtsütsü asoshi United Nations (UN) teloki timtem tulu ajurua liasü.