Teloktep Arab mitkartemi Yemen nung amakba maparen anena lir

Sanaa, July 27 (Agencies): Yemen nung alirtemi nungdakba chiyongtsü, mozü mora aser iba amala osettüset tongtsütsü nükjidong nung Saudi Arabia-i aniba teloktep Arab mitkartemi par tayimtsü amshia Yemen nung amakba maparen tang anena lir.

Ajisüaka, tongpang rarabaren anentsü asoshi par telok den osangtsüsang magiba olen ka Sanaa yimtiba densema Yemen kübok densemba tesem aika agia aliba Yemen sorkar anemer telok, Houthi-i metetdaktsüogo.

Tang Riyadh nung jenoka alisang, Yemen Tir, Abedrabbo Mansour Hadi yimtsütsü menden nung tanaben mendaktsütsü nükjidong nung teloktep Arab mitkartemi taoba ita 4 tejaklen nungi tenzüka Houthi telok anema raratsü tenzükba osang bushiteta lir.

Ajisüaka, Yemen nüburtem nem nungdakba chiyongtsü aser osettsüset tetsükdakba kecha majurui tongtsütsü nükjidong nung parnoki anogo 5 asoshi Yemen nung amakba maparen anentsü lemteta lir.

Teloktep Arab mitkartemi par amakba maparen anen aka, Houthi telokibo Yemen anülulentip tsütsü tentetba province-tem, Taez, Lahj aser Dhaleh nunger nung bomb-tem tsükdakja yasüng amakba osang bushitetogo.

Yemen sorkar anemertemi par tongpang nung amshitsü tank amshia Jebel Sabr tesem nung alir sorkar mitkartem dak bomb kalokja parnok aika tepsetba osanga jangjaogo ta mitkar ketdangser kati metetdaktsü.

Sanaa anüdoklen tsütsü, Marib nunga sorkar anemertemi sorkar mitkartem tanep anepongi amaktsü tenzüka par telok ana tsüngda tongpang kanga sashia raraba osang ka ketdangsersangi metetdaktsü.

“Yemen nung timtem toushi tulu ajurua alir nüburtem tia tajungba kümdaktsütsü mechi Yemen nung tongpang rarar ajungai anogo ishikaji tongpang meraratsü ajungshir,” ta United Nations (UN) Secretary General, Ban Ki-moon-ia temepishiba olen ka metetdaktsüogo.

Ajisüaka, “Anogo ishika atema tongpang meraratsü sentong renembaji ozü telok den tongtepratep mesüi benokogo anungji, tongpang meraratsü sentongji agizüker mesüra magizüker ta ozü teloki telangzüba magütsütsü,” ta Houthi telok lenisang, Mohammed Ali al-Houthi-ia metetdaktsü.

Taküm March tatembanglen nungi tenzüka Yemen sorkar aser Houthi telok na tsüngdang tonpang kanga sashia raratsü tenzükba sülen tanü tashi nung Yemen nung alir nisung 3,640 dak tema asüba osang bushiteta lir ta UN-i metetdaktsüogo.