Teloktep raksatsü dak alaka tanga lenmang maliasü: Nitish

Patna, August 01 (Agencies): Tanü Bihar Chief Minister, Nitish Kumar-i, state nung teloktep raksatsü dak alaka tanga lenmang maliasü, kechiyong yamaji mesüra ochimashi den tongpo apur asütsü, ta metetdaktsü.
Bihar nung JD-U, RJD aser Congress teloktep nungi JD-U-i atsüngba dak sendakba nung Nitish Kumar-i, ochimashi tai tonglokja CBI-i ken o benokba ajanga teloktep sorkar timtemba mebentettetba den külemi state atema bilemtsüba ajanga pai iba teloktep nungi atsüng, ta metetdaktsü.
Tanü state yimtiba, Patna nung osangbenertem senden ka nung jembidang Kumar-i, “CBI-i ochimashi tai tonglokja ken o benokogo (Lalu Prasad aser par kibong anema). Ni parnok dang telangzüba tajung agütsütsü metetdakja liasü. Ajisüaka parnoki ni ang asayamenüja, ni CBI ketdangser ka asü police ta asüngdang,” ta metetdaktsü.
Kumar-isa, ni parnok dang nungi kuli masüngdang, saka ochimashi dak sendakba nung parnok dang nungi telangzüba aginüa liasü, ta ashi.
“Ochimashi tai tongloktsüba atema Lalu-i telangzüba magütsü. Ni ochimashi anema jembir, anungji ni ola madoki melitet. Parnoki langzütsüsa kecha mali ta ni bilemer,” ta paisa metetdaktsü.
Ato kilonser, Narendra Modi tenüng sanga Kumar-i, “Modi den tokteptsüsa shinga daka tashi mali,” ta ashi.
RJD-i Modi anema jembiba otem dak sendakba nung Kumar-i, “Teloktep tenüng nung taitsüba ajak ni aremzüka aruogo. Ajisüaka JD(U)-ibo RJD tongti lenir anema kecha mejembi,” ta ashi.
Secularism dak sendakba nung tasüngdangba ka langzüdang Kumar-i, iba onük atema shinga dang nungi certificate menüngdaker, ta ashi.
Linük tatong Tir election dak sendakba nung Kumar-i, JD(U)-i Congress-i aniba opposition candidate, Gopal Krishna Gandhi yaritsü, ta metetdaktsü.