Teloktepi sorkar kümra anogoshia PM tasen kaka alitsü: Amit Shah

Kanpur, January 30 (Agencies): Opposition party tem teloktep ‘Mahagathbandhan’-i Ato kilonser candidate tenüng mesangdonger, ta aija tanü BJP National Tir, Amit Shah-i, teloktep party temi sorkar kümra anogoshia Ato kilonser tasen kaka alitsü, ta ashi.
Tanü Uttar Pradesh kübok Kanpur nung BJP nung booth-level workers den jembidang Amit Shah-i, “Mahagathbandhan ji tentetra opposition-i Ato kilonser candidate tenüng sangdongtsüla. Hombarnü Ato kilonserji Mayawati asutsü, Mongolbarnü Akhilesh Yadav asutsü, Bodhbarnü Mamata (Banerjee) asutsü, Brihostibarnü Sharad Pawar asutsü, Hokolbarnü Deve Gowda asutsü aser Honibarnü (M K) Stalin asutsü, aser Honibar o Deobar nabo sodi anogotem asutsü,” ta ashi.
“Parnoki temelenshi bener aruner, ajisüaka parnok rongnung lenir ka mali,” ta paisa ashi.
“Par sorkari linük tejakleni anir moutettsü. Onoki Modi kübok sorkar tashitait ka tentetner, ajisüaka parnoki tashimait sorkar tentetner, Modi-i dang tashitait sorkar agutsütettsü,” ta paisa ashi.
BJP Tirisa party nung inyakertem dang taruba Lok Sabha election nung takok angutsü atema meranga inyaktsü ayongzük.
“BJP-i item elections nung takok angutsüji linük atema tongtibang. Iba takokji opposition party tem anokshidaktsüsüsa asutsüla,” ta pai ashi.
Congress party aija pai, Ram Janmabhoomi onük jembitsü atema par lenirtem dak temeden mali, ta ashi.