Telongjem asoshi jembidi aser nokdakdi: WB CM Mamata

Kolkata, October 31 (Agencies): Honibar nü West Bengal Chief Minister, Mamata Banerjee-i, linük nung tamangba lokti tsüngda akhümtsüputep maliba ajanga la jashir ta shia telongjem asohi inyaktsü lai ayongzükogo.
“Tanü lokti nung telongjem maliba ajanga jashir. Kechiba telemsa aika adoker yimsüsütsü (?) Asenoki telongjem asoshi jembidi, telongjem asoshi nokdakdi. Asenoki telongjem asoshi inyakdi,” ta Banerjee-i twitter ajanga ayongzük.
Tanü Trinamool Congress tongti lenir Mamata-i taoba mapang Ato kilonser Indira Gandhi asüba anogomung nung la nem akhdm agütsü aser ‘Iron Man of India’ Sardar Vallabhbhai Patel asoba anogomung nung pa bilemteta akhüm agütsüogo.
“Iron Man of India, Sardar Patel asoba anogomung nung pa bilemteter. India telongjem atema pa mangdangji atangji nung ataloktsüdi,” ta lai ashi.
Tawa Delhi Police-i Delhi nung Kerala House-i oa nashi shi mita reprangba atema sashia aija Banerjee-i, “Iba ya nüburtem temeten nokdangtsü atema shisa makai aser tim mesüi merangba lir,” ta lai ashi.
Nüburtem temeten nung teka amouka inyakba anema Bengal nung yimtenren party temi Narendra Modi’er sorkar sashia aitsüogo.
Linük nung tamangba lokti tsüngda mepetmesü aser kaket keno zülurtem temeten nokdanga inyakba anema Hokolbar nü kaket keno zülurtem aser melunget telok balala nungi temelungertemi lungkak aita nashi shi party ka ayongzüka liasü.
Iba sentong nung sangro zülur, film community nungi artist tem aser yimtenren lenirtemi shilem agia liasü. Iba sentong nung o jembirtemi tawa Dadri, Uttar Pradesh nung Muslim nunger kati nashi shi achi ta tai tonglokja tepsetba, Kannada nunger kaketzülur nüngtugu M.M. Kalburgi tepsetba aser Delhi police-i Delhi nung Kerala House-i oa nashi shi mita reprangba tatalokbatem anema jembia liasü.
Iba lungkak aitba sentong nung shilem agirtem tsüngda kati ka tebang nung nashi shi nemja chitepogo, ajisüaka nashi shi machirtem atemabo nanglong densema tanga chiyungtsütem-a liasü.