Telongjem FC-i Nagaland tenüng nung Hero Futsal Club Championship nung shilem agitsü

Mokokchung, 22 Oct (TYO): All India Football Federation (AIFF)-i ayongba 1st Hero Futsal Club Championship 2021-2022 koba Delhi yimtiba nung November 5-13, 2021 tashi ayonga lir, iba asayamung nung Nagaland tenüng nung Telongjem FC-i shilem agitsü, ta Oct 22 nü Telongjem FC coach Tiakümzük-i ‘Just A Venue’ Mokokchung nung osangbener senden ka nung metetdaktsü.

Telongjem FC ya Mokokchung District Football Association (MDFA) kübok club ka lir aser tang MDFA Trophy Telongjem FC-i bena lir. Telongjem FC-isa taoba September ita Nagaland Football Assciation (NFA)-i ayongba 1st Nagaland Futsal Championship 2021 koba Dimapur nung asayaa liasü, iba nungjia champion aben. State level nung par club-i takok anguba ajanga AIFF nungi Hero Futsal Club Championship 2021-2022 nung shilem agitsü jaokba shiti yok, ta coach-isa ashi.

NFA-i Nagaland Futsal Championship ayongba ajanga national level nung shilem agitsüsa maongka ngutetba den player-tem AIFF CRS nung tenüng züngoktsüba asoshi NFA dang pelaba Telongjem FC coach-isa metetdaktsü. Onok club atema ibai mezüng tangaleni or shilem agir asütsü, aji oda, NFA aser MDFA nungi tenungita den lenmang balala sayuba asoshi parnok dang pelaba paisa shisem.

1st Hero Futsal Club Championship ya mezüngbo Shillong nung asayatsüba liasü saka nungdakbatem peria maliba ajanga Delhi-i belentsüsa kümatok, ta Telongjem FC coach-i ashi. Iba asayamung nung shilem agitsü atema senotsü tsütsü AIFF-i mechimenu kati yaritsü ta shiogo saka tanüngba senotsü ajakji club-i dang intoktsü shia lir, ta paisa shisem.

‘Club ka bendang talangi or shilem agitsübaji mapa temela masü, kechiyong yangi senotsü aika sentaka lir, anungji, onoki iba dak sentakba nung state sorkar dang yaridaktsünüa temepishiba yokogo aser parnok nungi telangzüba tajung angashitsü imlar’, ta paisa shisem.

1st Hero Futsal Club Championship nung shilem agitsü atema AIFF-i India nung state balala nungi club 16 jaokba rongnung Telongjem FC jia ka lir. Iba asayamung nung shilem agitsü atema par telok ya Nov 1, 2021 nü team management aser asayartem ajak senteper parnok 13 apusotsü, ta coach-isa metetdaktsü.