Telung aser Tema : Mathi 23: 23-33

“Nai tamasa marok aser su telunglen shidokang, ajagi temalen merüka akümtsü.” (Mt. 23:26).
Anemsü tetezü meputep. Tebilemba aser O meputep- temulung nung balaka bilemer, tema nung balaka jembir. Ibai ano O aser mapa meputepba lir (Mt. 23:2, 3); kidang balaka, kima-yimdong nung balaka. Kari yimdong nung tajungtiba lia sayur saka kidang tetsübutsü ka alir. Parnokji deobar nü kotak tenyar ama aser tanga anogo nung Satan ama alir.
Anemsüji koda adoker? Aikati Anemsü aliba tajung ta bilemer. Parnoki tangar dak tai angur aser parnok sasa metendaktsür (Mt. 7: 4,5). Telok nungi tenüngsang aginüa parnoki parnok telunglen takümji masü tema mapaji repranger (Mt. 23:25,26). Pei tajangzük bushiba (Ezk. 33:31), aser tongtipang nung masü mapa tila tongtipang südaktsüba agi (Mt. 23:24). Yisui “Nenok nüktapangtar aser auer aser nisung tepseter aiatai” ta mashi, saka “asenok anemsübatem aiatai” ta ashi. Anemsüji temenen.
Anemsüji tanelaren mapa nung timba angutsü. Kari tebang agi Kibuba tushir aser külemer, saka parnok temulungjang Pa den mali (Mt. 15: 7-9). Parnoki Pa O jangraa angatsü saka O jagi kechi ashir aji parnoki meinyaker (Ezk. 33: 31, 32). Kari tangar dang, dang sayutsüngir (Rom 2:21-23; T. Ken 50:16). Item nisungji yimsü mapa nunga kanga keta sena inyakba nisungtem asütsü. Parnoki tenla meranga agütsütsü aser O tajung bendena sarasadem asütsü aser lumitsü (Mt. 6:2, 5, 16). Itemi tangar dang tajung ama inyaka sayutsü saka temulungjang nung parnok anema sang apusor.
Anemsübatem tepelaji talangka malitsü, yakta samatsü ta Laishibai  sayur (Yob 8:13-15). “Iba amaji Tsüngrem amadoker ajak lemang atemer: Pa temulung alemba süktanger, aser Pa tamangji sorak ki ka mesük. Pai pei ki dak mangatoker, saka aji menokdaktsü; pai idakji tashiyim agi soter, saka aji matir.” Anemsübatem dang Tsüngremi “aiatai” ta shira parnok tarutsü kechi asütsü shisadangang. Mezüng kenü anogo nung O bendang agütsübaji anemsü liasü (T.M. 5:1-11).
Anemsüi tanela rajang kümdaktsür (1 Peter 2:1-3). Tsüngrem chirtemi anemsü nem kodanga menden magütsütsüla. Tsüngremi asen tebilemba ajak, mapa aser kong ali metetta lir (T. Ken 13:9). Tsüngrem O bendangdak asenok noktaktsü tsübuba jagi asenok kodanga metoktsütsüla (2 Kor. 5:10-12).
Tesangwa ajakji tesangwa masü; tamaren asoshi ochi tesangwaji shidakba tesangwa lir. (an ancient Tamil poet).