Telungjem aser yimjung nüngdak:MP Rio

Abelen noksa nung Lok Sabha MP, Neiphiu Rio-i Mon district semdangba mapang yimtsüng tekolakpurtemi anir sobaliba telok kati shilem agiba noksa nung angur. Ajichilen noksa nung MP, Neiphiu Rio-i Indo-Myanmar arrtsülen aliba Longwa yim Angh (tiyong) aser Deputy Angh na den tangokba noksa ka angur.  (Mon, November 05, 2015).

Mon, November 05 (TYO): Tanü Mon district nung Lok Sabha MP, Neiphiu Rio-i, nüburtemi tejakleni arua yimjung maparen nung nungita yaritsüla, ta ayongzük.
Eastern Naga Public Organisation (ENPO) lennirtem aser tongtibang nisungtem den shisa lemsatepba mapang Rio-i, terenlok atema nübur ajak ka küma lungjemer yimjung maparen nung nungita yaritsüla, ta ashi.
Pai Mon district ananü semdangdang Food Corporation of India (FCI) tesem semdanga district nung chiyungtsü indang asadanga liasü. Iba den külemi KNSK-i ayongba ‘Miss Mon Beauty Pageant’ nunga pa tongti tesemdanger ama aden. Iba sentong nung Rio-i, lanur shiai pei nükjidong aser tebilemba atongtsü asoshi kanga nendaka aser meranga inyaktsüla, ta tayongzükba agütsü.
Ano pai Mon nung aliba district administration aser department balala nung ketdangsertem aser lokti balala nung lennirtem, lanurtem, lokti tentettem aser sensotem den-a shisa lemsatepa liasü.
MP-i, Indo-Myanmar arrtsü nung aliba Longwa yim-a semdanga liasü. Sansad Adarsh Gram Yojana (SAGY) kübok terenlok agütsütsü atema pai iba yim shimtsü tebilemba lir. Longwa nung pai yimsüsürtem, lokti tentet balala nungi lennirtem aser ketdangsertem den yim terenlok tsütsü shisa lemsatep.
Iba mapang Myanmar nungi Naga nunger teshimtet telok ka arua pa den ajurutepba mapang pai-a Myanmar nung taruba democratic election takok ngua agitettsü sarasademtsür, ta ashi.
Paisa parnok dang, Naga nunger terenlok tsütsü jenjang tajungba akümtsü aser teti atema yimjung alitsü asoshi yimjung nung aser tangatetba tajung nung ken o jembitsüla, ta ashi.
Tan pai Mon semdangba mapang pa den State sorkar ketdangsertem, senior lennirtem, FCI nung State Level Consultative Committee züngsemtem aser lokti balala nungi lennirtem densema ao.