Telungpur 21-i Afghan sorkar nem bendanga agütsü

Afghanistan anüdoklentip tsütsülen, Baghlan province kübok Pul-e-Khumri yimti nung agiba telungpurtemi sorkar nem bendanga agüja temai adokba sentong nung Taliban telungpurtemi shilem agiba noksa nung angur. (Pul-e-Khumri, April 23)

Pul-e-Khumri, April 23 (Agencies): Afghanistan anüdoklentip tsütsülen, Baghlan province nung Taliban telungpur züngsem 21-i sorkar nem bendanga agüja tanü, Honibar nü temai adokba osang ka provincial governor, Satar Barriz-i metetdaktsüogo.
“Taliban telungpur 21-i sorkar anema rarabaren anena sorkar den agiba yimjung sentong nung adentsü nangzüka liasü. Parnoki abenba tongpang nung amshitsü rifle prangponga 21 tashi mitkar ketdangsertem nem Pul-e-Khumri yimti nung amoktsüogo,” ta pai ashi.
Paisa ashiba agi, tan sorkar nem bendanga agüja temai adokba telungpurtemji Baghlan kübok Dushi District nung sorkar anema rarabaren nung tongti shilem agirtem aliba osang jangjaogo.
“Tan telungpurtemi temai adokba ajanga Kabul yimti nungi anüdoklentip tsütsüleni kilometer 160 shi pilar tentetba Baghlan province nung yimji yimjung alitsü imlar,” ta Barriz-isa metetdaktsü.
2010 küm tom nungi tenzüka tanü tashi nung Taliban telungpur züngsem 10,000 dak temai Afghan sorkar nem bendanga agüja temai adoka sorkari ayongba yimjung sentong nung adenba osang bushiteta lir.