Telungpur telok ajungi Afghan yimjung sentong nung shilem agitsü ayongzüker: Rabbani

Kabul, February 23 (Agencies): Afghanistan sorkar aser Taliban telungpur telok na tsüngda yimjung tezüngzüktep asangsang nung agidaktsütsü nükjidong nung Afghanistan, Pakistan, China aser United States nungi tongti lenirtemi Afghanistan kübok Kabul nung senden amen tenzükogo.

Tan senden nung shilem agirtemi Afghan sorkar aser Taliban telok na tsüngda senden amentsü anogo latetba den külemi, senden amendaka renemtsütsü alizüng yua lir.

“Taliban telok den sema, Hizb-e-Islamic aser tanüngba telungpur teloktemia Afghan sorkar den yimjung tezüngzüktep agitsü asoshi ayongba yimjung sentong nung shilem agitsü ayongzüker,” ta Afghan Foreign Minister, Salahuddin Rabbani-i tanü senden nung metetdaktsü.

Paisa ashiba agi, tan senden nung shilem agir linük 4-i Afghan yimjung senden takok ngua agidaktsütsü sentong renema lir aser tan senden amenba sülen par telok ana tsüngda tan February ita tatemlen tashi nungbo yimjung senden asangsang nung mentettsüsa senden amentsü anogo aser senden amendak renemtetsü imlar.

Ajisüaka, Taliban teloki iba yimjung senden nung shilem agitsü mesüra magitsü lemtetba osang tanü tashi metetdakja mali aser par teloki taoba küm 1 tsüngda nung Afghanistan nung taoba mapang nungi lendong tesashiba atalokdaktsütsü tenzüka lir.

Taliban teloki yimjung senden nung shilem agitsü mesüra magitsü osang metetdakja meliaka, Hizb-e-Islam telok’er yimtenren kongsang lenisang, Ghairat Baheer-ibo Kabul-i ayongba yimjung senden nung shilem agitsü bilemba osang ka metetdaktsüogo.

“Kabul-i ayongba yimjung senden nung shilem agitsü bilemdangtsü tenzüka lir. Ajisüaka, Afghanistan-i ajurushia aliba mangatettepbaren ajunga bendangertem nem teka mamokdaktsüi pei sasep nung bentettsü asoshi ajungshir,” ta Baheer-i ashi.

Hizb-e-Islami telok ya Afghanistan nung tentetba telungpur telok tulu rong nung tanabuba telok lir.

Afghanistan nung telungpur den sentakba lendongtsüngdong balala nung mitkar aser telungpur denbo tai maketba nübur ang timba asüba osang bushitetba osang ka United Nations-ia metetdaktsüogo.

Yaküm, 2015 küm kisüng nung Afghan nübur nisung meyirijang 11 dak temai tasüba aser yiruba lendong ajuruba osang bushiteta lir ta UN-isa metetdaktsü.

Taliban telok densema, telungpur telok balala den yimjung tezüngzüktep agia tanaben sentaktepshitsü nükjidong nung Afghan Tir, Ashraf Ghani-ia High Peace Council (HPC) lenisang tasenba, Pir Sayed Ahmad Gilani shimba osang jangjaogo.

Gilani ya tongti Afghan jihadi lenir ka lir aser Afghanistan ajunga nung tentetba kin ajungai pa ya temaba jenjang nung ajungketa züngshir.

Taoba Afghan Tir, Hamid Karzai-i HPC tentetji 2010 küm tenteta yutsü.

You must be logged in to post a comment Login