Telungpur temai adokra sen lakh 4 den ita shia sen 6000 agütsütsü

New Delhi, Rongchii (April) 24 (Agencies): North-east nung temai adokba telungpur shia nem sen lakh 4 agütsütsü aser ita shia tanga tajangzüktem den sen 6,000 agütsütsü, ta ketdangsertemi metetdaktsü.
Taoba mapang temai adokba telungpur shia nem sen lakh 1 teyari agüja liasü saka tang ibaji lakh 4 kümtsüogo.
North east nung surrender-cum-rehabilitation policy ya 1998 küm mapa küma tenzük. Lanurtemi telungpur akümtsü mejangradaktsütsü atema taküm Rongchii (April) 1 nü iba policy meyipa reprangshi, ta Home Ministry ketdangser kati ashi.
“Inyakyim meyipa reprangshiba sülen, temai adokba telungpur shia nem taoba mapang sen lakh 1 agüja aliba nungi sen lakh 4 agütsütsü. Küm asem atema ita shia stipend sen 3,500 agütsüba nungi sen 6,000 agütsütsü” ta paisa ashi.
Ano, prangpong-injang atema sen 1,000 nungi lakh 1 ajungketogo. Temai adokba telungpur ajak nem vocational training agütsütsü, rehabilitation camps yanglutsü atema sen agütsütsü aser temai adoker ajak compulsory Aadhar biometric registration agitsü.
Home Ministry-isa Rongchii (Arpril) 1 nungi north-east state tem atema Security Related Expenditure (SRE) Scheme reprangshiogo. Iba police reprangshimba sülen telungpuri inyakba lendong nung civilian asütsüsa tensa ajurudang sen lakh 1 teyari agütsüba nungi sen lakh 2 agütsütsü. Ano, kasa tatalokba nung police kar tasüba ajurura sen lakh 3 agüja aliba nungi lakh 20 agütsütsü, ta ketdangserisa shisem.
Police kar telungpur den raradang teti atema lemtatsüsa kümra sen lakh 5 agütsütsü, Home Guards nem anogo shia sen 150 agüja aliba ita shia sen 6,000 agütsütsü, Village Defence Guard (VDP) nem honorarium ita shia sen 1,500 agüja aliba nungi sen 3,000 agütsütsü aser designated camp nung SoO (Suspension of Operations) indang züngsem shia nem ita shia sen 3,000 agüja aliba nungi sen 6,000 agütsütsü.
Centre sorkarisa India Reserve Battalions 10 lapoktsü atema lemzüktsüogo. Itemji Assam, Arunachal Pradesh, Manipur, Meghalaya aser Tripura nung anana lapoktsü.
North east state tem nung air connectivity agütsütsü atema Manipur nunga helicopter services tenzüktsü.
Tang iba service ya Arunachal Pradesh, Meghalaya, Nagaland, Sikkim, Tripura aser Mizoram nung tenzüka lir.