Telungpur tetsüdi Chhota Rajan Tihar Jail nung puokogo

New Delhi, November 20 (Agencies): Telungur tetsüdi Chhota Rajan anogo 14 nü Judicial ket nung yur yashi Brihostibar nü pa Tihar Jail, Jail no 2 nung puokba sülen jail telung aser temeket naprongla nung security akangshiogo.

“Jail ketdangsertem dang iba tesemji minute shia reprangtsü aser security sashia agütsütsü tuyuogo. Iba atemaji jail balala nungi head warder 10, warder 10, deputy superintendent ka aser assistant superintendent ana anir aruogo,” ta senior jail ketdangser kati ashi.

“DG-i staff tem dang tekümdangtsü shiogo aser security tashimeiti langka danga atalokra magizükettsü ta shiogo,” ta paisa shisem.

Rajan anogo 14 nü judicial ket nung ayuba sülen security akanga aliba Tihar jail nung puok. Maharashtra Police-i pa anema ken o 71 benoka alibaji CBI-i bushisüngdangtsü lemtetogo.

“Jail nung Rajan-i pa semdangtsüpur atema pa kinüngtsü aser Mumbai nung tembar ka na tenüng agütsüogo,” ta paisa ashi.

ITBP aser CRPF sepaitemi jail temeket anüktsü.

Arishi küm 55 Rajan ya tesüiba küm 27 tashi bendanglen jenshia aliba sülen October 25, 2015 nü Indonesia, Bali police-i apu. Iba mapang nungjagi tenzüka pa tekaratiba nung India-i meyipa anir arutsü atema India ketdangsertemi inyaka liasü.