Telungpuri apuba police tepseter alitsü amai bilemer

Shillong, November 09 (Agencies): Noktanga aliba Garo National Liberation Army (GNLA) telungpuri pur aoba, Meghalaya police kaji tepseter asütsü ta temulung melemi bilemer. Iba dak sentakba nung police-i kasa telok nungi züngsem asem pua lir.
Area commander Philliport-i aniba GNLA telungpuri Dobima tesem nung aliba Mendipathar nungi Songsak-i aoba lenmang nung November 6 nü Havildar Khomraj Bhattarai den business inyaker nisung ka pua bener ao.
“Iba dak sentakba nung onoki ano osang tejangja mongutet ajisüaka tena pua bener aoer nisung asembo onoki pua lir,” ta North Garo Hills district nung Superintendent of Police in-charge, Ramesh Singh-i osangbenertemdang ashi.
Aji oda süaka ano police ketdangser katibo pua bener or alisang, police kaji telungpuri tepsetogo ta ashi.
“Onoki GNLA telungpur phone ajanga jembiba osang kar ajanga police sangji tepsetogo ta metet. Ajisüaka Havildar Khomraj mang mangu tashi iba osang ya yimjak nung memetetdaktsütsü,” ta police ketdangser jagi pa tenüng memetetdaktsüi ashi.
Ramesh Singh-i, “Tena kechi nung mima lir’ar ano mejangja. Onoki tena kümzüktsü asoshi operation tenzükogo,” ta ashi.
Police-i ashiba agi ita ter tsüngda nung telungpuri sen akhangtsü mechi nisung 87 pur ogo aser parnok pur oa alir rongnung civilian 25, business inyaker 27 aser nija company nung inyaker 25 den sorkar tenzüker parnok 5 aser tesayur 5 lir.