Telungpuri Manipur-Assam highway nung gari tarensena aliba amak

Imphal, Jan. 24 (Agencies) : Mongulbarnü Assam aser Manipur yimtiba na sendaktepba national highway nung telungpur asütsü akok ta temulung melemi bilemba telok kati truck gari aser totzü bena aliba garitem mokdanga ata lir amak, ta police ketdangser kati ashi.
Anüngdang Khongkhang nung security aser telungpur na tsüngda kanga sashia injang yoktep ajisüaka tasüba osangbo kecha mali, ta ketdangser jagi ashi.
Jiribam nungi Central Reserve Police Force aser Seema Suraksha Bal sepaitemi meiner aruya aliba truck aser totzü abenba gari 300 shi NH-37 nung amak, ta pai ashi.
Item gari amaktsü asoshi telungpurtemi parnok maongka tajung angutsü apia khula aika aliba tesem shimer mokdanga ata liasü.
Khatepdang totzü bena aliba gari ka indang garitsüng pokma saka garibo mapok.
Yangji aliba gari anir kati, “Injang agi khapokba tapok nungi totzü nungteta adokba nembangtsü merangdang minute 30 shi agi” ta ashi.
Item gari meina aoer security temi injang akhatsü tenzükba ajanga telungpurtem jenshi aser iba tesem kanga junga mita aotsü atema sepai tali yoksem.
Telungpurji tenemleni jena ao asütsü akok, ta security rongnung kati ashi.
Hopta ishika tejakdanga iba mesükba lendong ajurudang gari anir ana yiru aser garia kar raksa. Iba lendong nungji telungpur jagi automatic rifle tem agi akha. Ajisüaka tang tashi iba dak sendakba nung shinga pua mali.
Imphal-Moreh Trans Asian Highway-1 nung telungpuri mokdanga lir police amakba mapa aiben ataloka aruogo aser iba mapa police taküm kar agiba den aika yiruja liasü.
Tawa-a telungpurtemi Noney district kübok NH-37 nung injang akhaba lendong nung public ka asü aser asem yiru.
Police-i, iba mesükba lendong ya NSCN(IM)-ia khen agütsüogo, ta ashi.
Manipur sorkar-i, Manipur NH-37 nung garitem meina senzütsü atema central paramilitary force company 60 yoktsü temepishiba agütsü saka company 26 ang yoka lir, ta ashi.
Nagaland ajanga aoba NH-2 nungbo security maliba agi tang tashi iba lenmangji ajanga gari mejajateter.