Telungpuri nisung ka dak akha

Imphal, August 9 (Agencies): Manipur nung telungpurtemi tetsürtem tashiyim agi raksatsürtem merenshitsü ta sangdongba mapa küma inyaka odar aser iba dak sendakba ken o ka nung parnoki nisung ka kanga mejungi yirutsüogo. Iba nisungba ya 2013 küm tetsür ka tashiyim agi raksatsüba nung aija lir.
Telüngpur asütsü ta temolung melemi bilemba nisung asemi S. Bhogen dak prangpong agi akha aser kanga mejungi yirutsü. Pa ya Imphal kübok Lamsang nungi lir. Iba tatalokba sülen pa Regional Institute of Medical Sciences, Imphal-i tamang anepalutsü atema aritepa anir ao.
Mozüki nungi osang ka ajanga ashiba agi, Bhogen teka tabelen len aser tepok nung injang agi khaa lir aser temang kanga mejungi lir. Pai 2013 küm tetsür ka tashiyim agi raksatsü ta aija lir aser iba ken o dak sendakba nung pa mapangshia okadaki aoer.
Police temi ashiba agi, telungpur ta temolung melemi bilemba nisung asemi Bhogen dak Imphal Lamphel police station kübok Takyel tesem nung akha. Pa okadak nungi kidangi meyipa oya aliba mapang iba ya atalok.
Police osang ajanga ashiba agi, pai tetsür ka tashiyim agi raksatsüba dak sendakba nung telungpurtemi pa khasettsü merang südi.
July 28 nü United National Liberation Front puri Imphal nung tetsür ka tashiyim agi raksatsüba ken o nung nisung ka khaset. Osangbenertem den jembidang iba nisungba yagi pai aibelenba nangzüka liasü.
United National Liberation Front puri tawa tetsür tashiyim agi raksatsürtem merenshitsü, ta sangdongogo.