Telungpurtemi Afghanistan nung lendong atalodaktsütsü akok: NATO

Islamabad, April 26 (Agencies): Afghanistan yimtiba, Kabul densema, Afghanistan linük kübok province balala nung telungpurtemi lendong atalokdaktsütsü sentong renemba tekümdangtsü osang ka North Atlantic Treaty Organization (NATO) mitkar lenirtemi tanü, Mongolbar nü metetdaktsüogo.

Lendong atalokdaktsütsü sentong renemba osangji lemsatepba den külemi, lendong atalokdaktsütsü sentong renemer telungpur tenüng 8 tashi metetdakja osangtsüsang lazükertemi parnok den tongteprateptsü asoshi NATO’er Resolute Support Mission (RSM)-i tanü metetdaktsü.

“Haqqani aser Taliban telungpurtemi Afghanistan northeast tsütsülen, Parwan, Khost, Kabul aser Logar nunger densemba province-tem nung lendong atalokdaktsütsü sentong renemba osang lazükogo,” ta RSM-i nenshia ashi saka iba amaktsü den sentakba osang tangbo memetetdaktsü.

Taliban telungpur teloki nisung 70 shi tepsetba den külemi, nisung 347 dak tema yiruja Kabul yimti nung lendong atalokdaktsür hopta shi lir külen NATO-i Afghanistan nung maneni lendong atalokdaktsütsü sentong renemba osang ya metetdaktsür lir.