Telungpurtemi AR amakdang sepai aser telungpur 4 tepset

Guwahati, January 22 (Agencies): Deobarnü Assam, Tinsukia district nung telungpurtemi Assam Rifles gari amakdang security sepai ana tepset aser asem yirutsü, iba sülen kahtepang telungpurtema ana tepset.
Osangbener den jembidang Defence otongdar kati, Jagun 12th Mile Mile Barabasti nung aliba NH-53 nung telungpurtemi Assam Rifles gari ka dak grenade aika mereploktsü, koba ajanga iba tesem nungji sepai ana asü aser asem yiru, ta metetdaktsü.
Security sepaitemia meyiper injang kahloktsüdang telungpur ana tepset, aser Arunachal Pradesh den arrtsülen aliba tesem nungji maneni raradar, ta defence otongdarisa ashi.
Iba tatalokba sülen anasa aliba India-Myanmar arrtsü shibangogo aser arem min nungji helicopter amshia telungpurtem mita odar.
Tesem ajakji longbanger mita odar, aser ibaji ajanga anogo asemnü Pangsau Pass festival nungi meyipa arur raliwalirtem highway nung anendena lir, ta paisa ashi.
Pangsau Festival ya Indo-Myanmar arrtsülen aliba tesem nungji among.
Tanü amakba tenüng agia ULFA(I)-i sangdong ka ajanga, parnoki tanga telok pezü den senteper amak aser security sepai asem tepset, ta metetdaktsü.
ULFA(I) Commander, Paresh Asom (Baruah) aser Coordination Committee Chairman, M M Ngouba nati külem sangdong ka ajanga, iba amakba nungji security sepai ana mesüra iba dak tali yirutsü aser AK prangpong ana den INSAS rifle ka apu, ta metetdaktsü.
Coordination Committee (CorCom)-i, Peoples Revolutionary Party of Kangleipak, Peoples Revolutionary Party of Kangleipak (Progressive), Revolutionary Peoples Front aser United National Liberation Front and United Liberation Front Of Asom [ULFA-Independent] senteper ibaji inyak, ta metetdaktsü.