Telungpurtemi Kashmir atema mebilemtsür: Rajnath

Srinagar, September 05 (Agencies): Separatist züngsemtemi Centre nungi MP tem ajurua ken o jembitsü memelungba sülen anogo ka lir tanü Union Home Minister, Rajnath Singh-i, Sepaeratist temi ‘meimchir, democracy aser J&K’ atema mebilemtsür ama reprangteter, ta aitsüogo.
Osangbenertem senden nung jembidang Home Minister-i, “J&K ji India shilem ka liasü, aser yamajisa alitsü,” ta ashi.
Singh-i aniba party ajak nungi teshimtet lenirtemi Kashmir nung telok balala ajurua jembiba indang osang metetdaktsüdang pai, “Ajaki tebilemtsü akar, Kashmir onüktem nung temelenshi nüngdak, ibaji ajak tangatetba,” ta ashi.
“Kashmir nung tensa süngjemtsü atema Centre-i state sorkar den yaritepa inyakdar,” ta paisa metetdaktsü.
Ken o jembitsü atema sorkari kishi maneni lapokja lir ta shia Singh-i, lokti balala nungi nisung 300 shii MP tem ajuruogo aser parnok timba kati, Kashmir nung tesünep alitsüla ta shiogo, ta metetdaktsü.
Ano külen CPI-M General Secretary, Sitaram Yechury-i sorkar dang, Kashmir tesünep atema sorkari telatetba kecha makai separatists densema stakeholders ajak den ken o jembi tenzüktsüla, ta mepishiogo.
Delhi nungi teshimtet teloki yashi Kashmir nung yimtenren party tem densema telok 30 shi ajurua liasü.
Kashmir nung tensa maneni mejungi lir. July 8 nü sepaitemi Hizbul Mujahideen commander, Burhan Wani tepsetba sülen nüburtemi longkak aita sepaitem den raradang tajemba agi nisung  74 süogo aser nisung 12,000 jungnüa yiruogo.