Telungpurtemi Manipur nung nisung ka khaset

Imphal, Aenjeti 5 (Agencies): Telungpurtemi Manipur nung tetsür ka tashiyim agi raksatsüba dak sendakba nung temulung melemi bilemba nisung ka khasetogo, aser parnoki maneni iba ken o nung aibelenertem tepsettsü, ta amokmerenogo.
United National Liberation Front (UNLF) puri Imphal West district nung Yangtepnü (Brehostibar) arishi küm 35 tain Laiphrakpam Sana Ningthem kidangi meyipa arua aliba mapang nung khaset, ta police sangdong ka ajanga metetdaktsü.
United National Liberation Front (UNLF) puri Ningthem-i 2015 küm Rongchii (April) 26 nü tetsür ka tashiyim agi raksatsüba aser iba sülen la tepsettsü merangba atema pa aija tepset. Ningthem ya bail nung tepuokdak nungi chioker liasü.
UNLF puri ashiba agi, parnoki Manipur nung tetsürtem tashiyim agi raksatsürtem maneni merenshi tenzüktsü. Par telok yagi iba maparen ya tanga mapang nunga inyaka aruogo.
Taoba hopta tetsürtem atema fast track court obendanger A. Noutuneswori-i tashiyim agi tetsür ka raksatsüba ken o nung nisung ka aija taküm peyong tepuokdak ayutsüba atema tetuyuba agütsüogo, aser pa den külemi iba ken o nung densema aliba nisung ana küm 20 atema tepuokdaki yokogo.