Telungpurtemi Manipur nung security camp amak, prangpong 20 bener ajen

Imphal, December 17 (Agencies): Tribal telungpur telok tulu kati Manipur, Noney district nung Paramilitary camp ka ajungbena amak aser automatic prangpong 20 shi bener ajen, ta ketdangsertem osang ka ajanga metetdaktsü.
Tang tasen tentetba district, Noney kübok Nungkao nung India Reserve Battalion aser Manipur Rifles temi anükba camp ji tanü 11:30 ako meta amak.
“Telungpur 70 shi-i camp ji amak. Parnok raraba sübutsü semer liasü aser prangpong tajung bena liasü,” ta ketdangser kati ashi.
Ajisüaka shinga tsütsülen nungi injang makah aser nisung asüba mesüra yiruba maliasü, ta ketdangserisa metetdaktsü.
Ano tanga osang ka nung Imphal nung Manipur Rifles sepai anati Tiddim gari lenmang nokdanger tetsür ka dak injang kaloktsü saka asüamaba osang maliasü, ta ashi.
Police asem tepsetba aser security sepaitem amakba anema testsürtemi ghonda 24 nokdangba mapang nung iba ya atalok.
“Sepaitemji Congress MLA Phungzathang Tonsing’er ki anükertem lir. Injang kahloktsüba sülen parnok ki telung jagi ai,” ta longkak aiter tetsür kati ashi.
Ajisüaka police tesemji atongba sülen parnok anitet. Tenati longkak aitertem dang tatok meshiba sülen tena yoktsü mela.