Telungpurtemi nisung aika pua yur marakzüdaktsür

Jalalabad, Afghanistan, Chiteni 31 (Agences) : Tanü Sangtennü Afghanistan anüdoklen tsütsü Jalalabad yimti nung nisung kar prangpong bener sorkar ki ka telungi tuagi nisung aika pua ayu.
Ketdangsertem aser tenük kuli purtemi ashiba agi, sorkar ki jagi aidak süngkhüm nung nisung kati mezüngbuba taküm bendanga agüja bomb pokloktsüba sülen tangartemji ki telung jagi senoka atu.
Taliban telokibo ibaji parnoki meinyak ta shiogo saka ano iba osang zülu tashi nung kecha telokia ibaji parnoki inyak ta kibur küma memetetdaktsü.
Tawa hopta ishika tsüngda yimti nung Islamic State telungpur teloki tashiyim maparen balala inyakogo.
Tenük agi angur nisung ka tenüng agi Obaidullah-i ashiba agi, gari tila tanak ka nung nisung asem aru aser süngkhüm anasa nisung kati taküm bendanga agüja pasasa pokseta asü; ajiser nisung ana prangpong bener ki telung jagi atu.
Tatsüka lir parnok aruba gari nunga bomb apok aser iba mapang yimdong nung alir nisung aika yiru.
“Onoki nisung aika yirur aliba nguogo aser parnokji yaria tekümzükdak bushia bener yok,” ta paisa metetdaktsü.
Sepaitemi iba tesem telungzükji longbanga lir saka maneni injang yokba aser bomb pokloktsüba ola angashi.
Ki telung nung jagi nisung 40 shi madokteti lir, ta local provincial council züngsem ka tenüng agi Sohrab Qaderi-i metetdaktsü.
Pua alirtem (hostage) rongnungi nisung kati security services den phone ajanga jembidang ashiba agi, prangpong amertem jagi shinga marakzütsü ozüng agüja lir, ta Qaderi-isa metetdaktsü.