Telungpurtemi temai adoktsüla: Sangma

Shillong, November 17 (Agencies): Hokolbarnü Meghalaya state sorkari, ozüng ajanga nokdanger aliba telok balala nungi telungpurtemi temai adoka sorkar indang rehabilitation programmes nungi tajangzük agitsüla, ta metetdaktsü.
Shillong nung State Security Commission senden tembangba sülen osangbenertem den jembidang Chief Minister, Mukul Sangma-i, state sorkar kasa tangatetba nung lir aser telungpur telok balala nungi temai adokertem atema asalentong tajung lir, aser parnoki sorkar training aser rehabilitation teyari agitsüla, ta ashi.
“Tesüiba mapang atalokbatem nung ajemdaker onok tangatetbaji- onok parnok nem yimjung atema inyakdaktsür,” ta paisa ashi.
Sangma-isa, Garo National Liberation Army (GNLA) telok nungi züngsem aikati temai adoka sorkar nungi teyari agiogo, ta ashi.
State sorkaria telungpur teloktem den ken o jembiner, ajisüaka parnoki India sorkar den tama jembitsüla, ta ashi.
Garo Hills tensa dak sendakba nung tasüngdangba ka langzüdang Sangma-i, telungpur aser kiralongraba tebilemtsü dak sendakba nung tayongzükba balala koktettsü atema sorkari police tashi itshitsü, tiyongtsü ia langka kar inyaktsü aser police nungittsü, ta ashi.