Temai adokba NSCN (K) züngsemtem yaritsü: Kiren Rijiju

Guwahati, June 10 (Agencies): NSCN(K) chairman S S Khaplang sür anogo ka lir, Centre-i NSCN(K) nung züngsema aliba India sensotemi ozüng alema mapa inyakba toktsüra, teyari agütsütsü ta metetdaktsüogo.
“Onoki NSCN(K) nung Indian Naga nunger ajak dang temai adoktsü mepishir. Shibaisa ozüng alema inyakba mapa toktsüdir, onoki parnok nem teyari agütsütsü. India sorkari parnok nem ‘rehabilitation package’ agütsütsü” ta Union Minister Kiren Rijiju-i tanü osangbener dang ashi.
“Telungpurtemi ‘rehabilitation package’ maongka agia, temai adoktsüla. Ajisüaka, iba nung India-i NSCN(K) nung züngsema aliba Myanmar nunger sensotem indangbo mejembir” ta paisa ashi.
Khaplang ji NSCN(K) indang mulungjang aser tanüla liasü aser pa medeni telokji tejakleni moutettsü, ta Rijiju-isa shisem.
“Tanishir ka melira, telok kati timtem ajurutsü. Tangbo NSCN-K indang alizüng metongtettsü. Anungji, telungpurtemi loktiliba asoshi bilemja, temai adoktsüla” ta Minister of state for Home Affairs-isa metetdaktsü.
Khaplang ji Myanmar senso ka liasü aser pa Myanmar nung akhüm liasü. Iba jagi India nungi telungpur teloktemi S S Khaplang akhüm kübok Myanmar nung jenoka lir. Anungji, pa asüba ajanga item teloktemia tetsükdaktsü ajurutsü” ta Rijiju-isa ashi.
“2015 küm India sorkari NSCN(K) telok nokdangba sülen ceasefire agien. Nagaland, Arunachal Pradesh anüdoklen, Manipur aser Assam nung tesem kar nung parnoki timtem agütsür. NSCN(K) ji ozüngi nokdangba telok ka lir,” ta Rijiju-isa shisem.