Temang nung bomb alenloker apoker kati Afghanistan nung 29 pokset

Kabul, August 9 (Agencies): Temang nung bomb alenloker, pei taküm bendaka agüja bomb apoker, Taliban züngsem kati Kunduz, Afghanistan nung nisung 29 poksettsü aser tasürtemji security force tem den meputepi alir mesüra kiralongrar nisungtem liasü, ta Deobar nü Afghanistan ketdangsertemi ashi.
Khan Abad district nung ketdangser rongnung tekolakba, Heyatullah Amiri-i ashiba agi, Honibar aonung ozüng anema inyaker telok ka senden akaba tesemi iba bomb apoksang ya tetsüng agi ao, aser pa dak alenloka aliba bombji pokdaktsü. Tasürtem rongnung parnok 25 bo kiralongrartem liasü aser tanüngba pezüji civilian liasü.
Iba lendong nung nisung 19 yirua liasü, ta paisa shisem.
Iba lendong ya Taliban teloki agütsü ta tenüng agiba osang, Taliban telok nung otongdar Zabihullah Mujahid-i media dangi email ajanga yok.
Yaküm küm tatemlen nungi US aser NATO sepaitemi linük nung training agüja yaritsü tenzükba sülen Taliban-i iba ama lendong agütsütsü tenzük.
Badakhshan province tesemlena Taliban teloki arishi küm 27 tain, tanur asem tetsü ka seplepa jajaba ken o nung aitsür alenseta südaktsü, ta iba tesem nung Angh meyong otongdar Nawid Frotan-i ashi. La ya Honibar nü nübur aika adenshia aliba tesem ka nung süngdong ka nung alenseta südaktsü.
Kasa tesem nung Honibar nüsa tatalokba balaka nung Taliban teloki police ana den civilian ka tekolak atang. Par asem ya indangiter nisung lir ta aija tekolak tangzüka yok, ta Frotan-i ashi.
Nangarhar province anüdoklen tesem nung Afghanistan sepaitemi Honibar nü drone ajanga amakba mapang telungpur 15 asü aser 9 yiru, ta iba province nung police tekolakba meyong otongdar Hazrat Hussain Mashreqiwal-i ashi.
Mashreqiwal-i ashiba agi, international force temi tayimtsü ajanga tesem balala nung makayonga aoba mapang telungpur 10 tepsetogo.
Nangarhar province nung aliba district asem nungi Taliban telok aridoktsü atema operation kanga sashia odar, ta paisa ashi.