Temang shilem tenlaba atema Modi-i Tamil Nadu tenüng as anger

Chennai, October 26 (Agencies): Deobar nü Ato kilonser Narendra Modi-i Tamil Nadu state-i temang shilem/telen tenlaba indang programme junga inyakba atema tenüngsang agütsüogo.

“Tamil Nadu-i temang telen tenlaba programme junga inyaker,” ta Modi-i ashi.

Ita shia aliba Raido sentong ‘Mann Ki Baat’ nung jembidang Modi-i, linük nung temang shilem tenlatsü nüngdaka lir ta ashiba den külemi küm shia India nung tezüngjang, temelungjang aser temesen lakh 2.5 dak tema nüngdaker, ta ashi.

“Küm shia temang shilem tenlaba transplant 5,000 dang takok ngua agiteter. Küm shia asenoki tajemba agi tenük/nükjang lakh ka nüngdaker. Ajisüaka asenoki transplant 25,000 dang agiteter. Gari lenmang lendong nung asürtem indang temang shilemten tenlatsü akok. Iba dak sentakba nung teinyaktsü kar dang lir,” ta pai ashi.

Paisa ashiba agi, temang telen tenlaba maparen tezübaba akümtsü asoshi state karibo kaket dak sentakba mapa ishiba kümtsüogo.

Tamil Nadu sorkar, health & family welfare department-i 2008 küm September ita nung State Cadaver Transplant Programme tenzüka liasü. Tang state nung organ transplant hospital 55 lir. Sorkar aser nija hospital napronglai iba programme nung shilem agir (www.tnos.org).

2014 küm asür 155-i temang shilem tenlaba ajanga Tamil nung nisung 500 dak tema taküm kümzükogo. 2008 küm parnoki iba programme tenzükba sülen 2014 küm tenla agütsüba timtiba liasü.

Taküm February 15 nüa state nung tekolok tasü alir nisung 19 kibongtemi par kinüngertem temang shilemji tenlatsü nangzüka liasü.