Temang yakyaka alitsüji police ka teinyaktsü: CM

Dimapur, November 07 (Agencies): Nagaland Chief Minister, TR Zeliang-i lapoktsüba sülen Chumukedima nung 65th BN Mullick All India Police Football Championship asayatsü tenzükogo.
“Temang yakyaka alitsü aser tanishirtemi ayongba saisapong sentong nung shilem agitsüji mitkar sübotsü asemer ka teinyaktsü lir. Asayatem nung takok angutsü meranga shilem agiba den ochishia, asaya yimya tajungtiba benshia asayatsüla,” ta Zeliang-i metetdaktsü.
“Tanü putu nung saisapongtsü sabang kanga tongtipang akümtsü tenzüka lir kechiyong saisapongtsüji temang anema lia, pelatepbaren dang masü saka iba sabang nung shilem agiba ajanga alima ajunga nung asayar million aikati peipok mesüteta alir. Alima linüktemi tongpang nung dang masü saka saisapongtsü sabang nunga temaba jenjang angutsü meranger. Anungji, asayartemi tajungtiba agüja shilem agiba ajanga pei state aser linük nem konang nüngsang bener arutsütsü ajungshir,” ta pai tayongzükba olen ka sangoktsü.
Chief Minister-i asayamong lapoktsüba den nüngo kaket ka sayaja liasü.
Tanü asayamong lapokba sentong nung Nagaland Home Minister, Y. Patton aser Nagaland Parliamentary Secretary, Irrigation & Flood Control, Jacob Zhimomi natia shilem agia liasü.
1999 aser 2008 küm ayongba densema, Nagaland-i tan agi BN Mullick Memorial Championship tasembenbuba ayonger lir.
Nagaland teloki 1997 küm Lucknow nung asayaba asayamong takok marok agizük aser 1989 küm Jaipur, 1996 küm Shillong, 2002 küm Dergaon aser 2004 küm Kerala nung ayongba asayamong nung 3 buba jenjang ngua liasü.
NAPTC Stadium, 1 NAP Ground, PTS Ground aser Sports Complex Ground densema, Chumukedima kübok asayadak 4 tashi nung asayaba asayamong nung India linük ajunga nungi asayatsü telok 39 tashi shilem agitsü tenzüka lir.