Tematiba Mapa (T. Ken 100:1-5)

Nai Tsüngrem tenüng asangba ken atendang Laishiba nung Tenüngsang Ken 100 ji atener ta bilemtetang. Iba ken nung Kibuba koda külemtsü tetuyuba agütsür.
Shibai Kibuba külemtsü ? “Nenok alima ajak, Kibuba dang tepela ola yokang” (t.1). Tsüngremi alima ajungai Pa külemdaktsüner aser tenüng sangdaktsüner. Kechiba asenoki alima ajaki oa osangtajungji sayutsüla ? Kenü alimai Kibuba dangi tepela ola yoktsü atema.
Asenoki Kibubaji koda külemtsü ? Mezüngbuba, tenzükba ajanga. “Tepela agi Kibuba tenzükang: Pa tsüngdangi ken tena arung” (t.2). Asenoki tepela agi Kibuba tenzüktsüla kechiaser asenok mulungjang nung tepela lir aser Kibuba tepelai asenok nem tashi agütsür.
Tanabuba, asenok ken agi Kibuba tenzüktsü akok. “Kibuba tsüngdangi ken tena arung.” Asenoki kenji tentet mapa ka ama dangbo matentsü. Ken kaket amer ken atener saka asenok mulungjangbo talang nung pilar alir. Ken nung ashiba tetezüji shisadanga atentsüla.
Asenoki Pa nem bendanga agütsüba ajanga Pa külemer. “Kibuba, Paji Tsüngrem ta nenoki metetang: Pai asenok yanglu, aser asenok Pa chiyimdak chiyimba santem” (t.3). Pa nem agüjang. Pa anidakang. Pa dang tashi angang.
Tatemsa asenoki tenla agütsüba ajanga Kibuba külemer. “Tenüngsang agi Pa süngkümi iang, aser Pa talidaki sanga iang; Pa dang tenüngsang agüjang, aser Pa nung moajang” (t.4). Nai tenla sabang nung shiruru agütsütsü menüngdak, saka nai ne mapang, sen aser temetetba agütsütsü akok.
Kechiba asenoki Kibuba külemtsüla? “Kechiaser Kibuba tajung lir; Pa temeim taochi aser putu ajak dang Pa temulung lemtetba, tatem maka” (t.5).
Khristan taküm nung tematiba mapaji Kibuba külembaji lir. Ne taküm kodanga tematazütsü ka tesüdaktsü. Tepela aser tenüng asangba mulungjang agi ken tena, bendanga agüja aser tenla agüja Pa külemang.