‘Tematiba Otsü’

~ Dr. Asangba Tzüdir.

Tesüngmangtsü aser temenungratsü otsü ka Kodak nung tenzük aser tanü tashi iba ‘otsü’ ya metembang. Iba otsü ya tesüngmangtsü tematiba nung Tsüngremer angati temeim jungkai adokba ka lir. Sentsüwangshi tamaren Chuba menden nüng mener, tebu Tsüngremi pei ajaso chir den ‘sensaksema’ ashir…Kü Jabaso! Na nükjidong tulu ka atema alimai alutsü aser nai shiranger anebtsütsü, nükpoker ngudaktsütsü, temenen süngra nung alena alirtem salatsütsü, timtemer aser khu reta abener anisüngzüktsütsü, aser nübürtem menen alangzüktsü aser tekümtet agütsütsü.
Tanüla agi shi kümer, tebu Tsüngrem nükjidong ataloktsütsü mechi pa Kangkidong nung meimchir menen alang, tasü madak takok ngur shia arur tanaben kodaki meyipa atu. Iba otsü ya maneni asenok meimchirtemi iba aiener lima nung jajadar. Aser asen Kotaker Tsüngremi teti asen molungjang nung tanemi jembia ashir, ‘Nai iba aien jaja ya nükjidong atalokdakja junga tembangtsü bilemdar ma ?’ Iba aien jaja ya Yisu Khrista ajanga dang tembangtet. Yohan 16: 4 nung shia ali ama, “Lenmang atangji aser taküm ni, ni ajanga mesüra shinga kü Bü dangi marur.” Anungji shirnokisa iba aien jaja takok ngua tembangnüdir tangar shinga alema masü saka Yisu Khrista ajanga dang tembangtettsü.
Aiben ni shisadanger… Tsüngremi tetenzük nüng alima yangludang kechi bilema liasu-ar na? Pa ajak madak masadangtetba TSÜNGREM asünung pai TEKÜMZÜKER ka bilema liasü sudi ta nibo bilemer. Anungji tetenzük nunga pa mulungjang nungbo ‘NA’ aser ‘NI’ bilema liasu. Aser iba ya atemzüka aliba tesüngjem temokong aonung ka jungkai adoka pai tematiba sempet agütsü.
Ya bilemteta asenoki küm shia Khrista asoba benjong amonger aser nisung shia terenemba balala akar. Yimti tila Bethlehem nung Mary aser Yosef tanendak maka teküpboktiba nashi ki ka nungang ajemalua tsük mejakdak su ka nung aso. Tanüa kasa ‘kinü Yisu’ tanendak bushidar? Shibai ‘anioktsü’? Na Yisu talidak renema lir ma? Nai tangar asoshi langka tajung inyaka lir ma? Nai tangar dang Tsüngrem temeim mapa agi sayua lir ma? Nai tangar sükseta, aben süoshi maka, yaa tsüra-a alidang anepalur ma? “Christmas ronem” ji Christmas decorations, Christmas father, Christmas presents, Christmas cake, Christmas feast, Christmas dress, Christmas concert, Christmas ‘drinks’ nungi madoker. Item ajanga nisung kar asoshi Christmas mongpu lemlatsü akok. Aji chichiba Christmas masü saka kechi benjong ar memetet amajok ‘X’-Mas benjong. Yisu khrista sentsüwangshi mesüdaktsüi ali shi nung dang peisasa pei temaba aser takatiba ta shisanga benjong yanglur aser Christmas benjong ajanga nisung rongnung telemsa tulu adokdaktsür.
Asenoki khen jungjunga aser khukhua shisadangdi. Herod Chubai Kinü Yisu tepsettsü bushiba medem kümdaktsür masü no ? Pei kidang kibong nung Kinü Yisu tepseta yur kodasür Christmas benjong amongtsü ? Pa tepseter koda iba aien jaja shibai lenitsü. Yisu majangi tebu Tsüngrem metongtet, anungji teti Yisü Khrista leniba asüngdanga pai melaba tsüngsü nung jajatsü tim. Iba otsü ya Kodak nung tenzük aser teshimtetba purtem asoshi yangjisa atemtsü.
Kinü Yisui nisung shia nem Christmas sempet bentsür arur – Nenok tebelemer aser khu reta abener ajak, kü dangi arung, aser ni nenok nem anisüngzük agütsüdi. Iba Christmas mongpu nung shiri Kinü Yisü chichiba ajurur, par asoshi temoatsüba süangma. Amen.