Temeim aser tesemba odangba (T. Ken 97: 1-12)

Tuodangba tajung. Asenok shidak odanga melira asenoki junga mejajatettsü. Khristan taküm nung ibai nüngdak. Iba jagi ken züluri ashi, “O nenok Kibuba meimertem, temenen sembaang!” (t.10). Na asoshi idakji tuodangba ka lir. Khristan rongnung kati ka mesempateptsüla, saka parnoki temenen sempatsüla.
Tanü alima nung temenen tsütsü asenok yimyaliro balala akatsü akok. Mezüngbuba, asenoki ibaji nokdangtsü akok. Khristan aikati ibaji meinyaker. Tamajungba taliang adokdaktsür. Parnok Satan ket nung asayar. Mesüra, tajung Samaria o entepba nung Putir aser Levi nungbai inyakba ama tamajung ngur tenük amur odang süia aotsü akok. Mesüra asenoki ibaji tepu shitepa aser teka ajitrepa aremzüktsü akok. Saka Tsüngrem O i ashir, asenoki tamajungji sempatsüla aser anema nokdaktsüla.
Asenoki tamajungji sempar kechiaser asenoki Kibuba meimer. Asenoki Pa meimra, Pai meimba mapa asenokia meimtsü aser Pai sempaba mapa asenokia sempatsü. Meimchir tesendaktep nunga ibai shidak lir. Nai kar dang meimra pai/lai meimba mapatem naia meimtsü, aser pai/lai sempaba mapatem naia sempatsü. Kodang Tsüngremi tamajunger o bendanger asenokia Pa tsütsü dener. Lot ama asenoki mesüner, pa temulung mepelai liaka, pa Sodom nunger majungji aremzük. Lot Sodom nung kechi atema ali ajakji Sodom mi agi arung dang ajak mitsü aküm (Lipok 19). “Pai temeshi nisung kümzüker; tamajunger teka nungi Pai parnok kümzüker.” Tsüngrem asenok tsütsü lir, shibai asenok anema arutsü ?
Alima nung tamajung tsütsü ne mulungsentsü kechi? Nai Kibuba meimra nai tetsüngda nung alitsü makok. Nai tamajungba anemtsüla aser nokdangtsüla kechiaser ibai lendong lir. Iba anema noktaktsü Tsüngrem dang tashi meshiang, aser shirnoki tamajung inyaker parnok tsüngdang tatishitsü tajung ka süa liang.