Temeim mekonga akümba

Tanü asenok arogo shia nung tenla ki topur tajung yangluba agi asenok nümadangteta pelaba ama, kenü anogo nütsüngremi Yisu Khrista dang Yirusalem tenla ki yangluba tesüngmangtsü mapatemji Pa dang sayunüa aru, saka Yisui parnok dang iba tenla kidangji nübortem sentep melitettsüsa ataloktsü ta ashidangang nütsüngtem aoksa südi, kechiyong idangjiang parnoki Pa dang, süra aji kodang ataloktsü aser na aruba aser alima tatem akümtsüsa aruba mapang temaitsüji kechisa asütsü (?) ta asüngdangba asenoki Mathi 24 nung shia angur. Tanü kodang asenoki ajuruba tensa mapang den küm meyirjang ana dak tali jakdang Yisui shina yutsüba ya medemdangdir, atangji, tang aliba lima yabo tatem kati arur amai angatetter. Iba lai tapu nung Yisui nütsüngtem dang Pa tanaben arutsü aser alima tatem kati arutsüba mapang ataloktsüba temaitsütem rongnung tekong 12 nung, ” ozüng raksar onsara nungji, temeim mekonga kümadoktsü,” ta ashiba o ya tanüang tali tajungba angatetter. Atangji, temeim mekonga kümadokbaji asenoki Tsüngrem meimba temeim mekongadokba ya dang masü saka asenok o asenok na rongnunga temeim mekonga kümadoktsü indang Yisui ashi südi ta angatetter. Iba kasa Lai tapu nung Yisui Pa tanaben arutsüba anasa alima kintem rongnung rara adoktsü, menoknok anoktsü aser ayawara arutsüba indang shia lir. Itemji kodang bilemdangdir, tanüa alima tesem aika nung rara aser menoknok anokba ajanga alu meyimtet aser business meinyaktet nübortem chiyongtsü maka ayaba purtem aika lir. Iba denji ano ozüng raksar onsara ta aliba tetezüji, ashir auer aser nisung tepsetertem dang masü, saka nübortem dang memeim ozüng mali ama pei sünütsü süa ochimashi mapa inyakbatem ya asütsü. Item tiaji süoki ia bilemdanga bushisüngdangertemi ashiba agi, tanü alima nung tashidak wara agi asüba purtem dangbo chiyongtsü maka ayaba agi asür teimba atalokdagi. Rara adoktsü, menoknok anoktsü aser idangji tang amai tashidak wara tapu balala poktettsü, ayawara arutsü , ozüng raksatsü aser temeim mekonga akümtsü ta asüba maparentem ya ‘chain’-ang ka mesüka sentaktepa lir. Ibaji kodang asenoki tang coronavirus wara agi shirangdaktsüba ajanga asenok timtem ajuruba tia den medemdangdir, temulung shirangtsüka, asenok rongnunga ayawara adoktsü ana nung lir aser temeimtep mekonga kümadokba angur. Asenok anema aser yimjung nung alidangbo asenok aikati teti meimtepa putepa alitsü amai bilemer, saka kodang tanü ama tashidak wara aser timtem nungi asensasa asen kümzüka alitsü atema alitsüsa mapang arudir, idangji asenok rongnung asenoki meteta temeim samadoker. Kasaji, kodang asenok ayawara agi tongdir, aya marem asenoki asen tebok asüngtsü merangdang asenoki meteta asenok rongnung temeim samadoktsü. Tanüa, joko, coronavirus tsübuba agi, arogoi dena pei kiojen mamshidaktsüner aser nübortemia pei kinunger, adianu, kiyonger aser yimtsür yimer asüyonga tak ta anasai marudaktsüner. Joko, tashidak tsübuba agi temeim mekonga akümnungji, ” Welcome” ta zülua aliba süngküm ajak to shibangogo. Shitakba agibo, shiranger anasai maotsü, itemjibo mozü kidang amongtsü; saka tashidak menaa alika asünunga ta temulung melemi bilemba nisungtemjibo, kong südir süaka, pei kidang asüyonga mesüra tanga ki ka nung asüyonga balaka, tashidak ali mali mejangja tashibo (home quarantine), parnok kechalenia maotsü aser tarua shinga marudaktsütsü ta mongdaktsüyonga kecha masü ser nung, asenok kanga tsübudaktsüba agi asenoki item purtem denji kiyong kidangersaa melinü temeim mekonga kümadokba angur. Atangji, coronavirus ta tetsübutsüka saka asenok ya talira tsübudaktsü amai reprangtetter. Ibayongji, shitakbabo masü ser nung aküm anüla dena tsübuadokba ama, joko asenok o asenok na kati ka meyariteptettsüsa tsükchir amai kümogo. Ajisüaka, Laishibaisa ashir, asenoki amangba aser imlaba ajak ya süitemtsü saka temeimbo kodanga majentsü. Ibaji Tsüngrem temeim lir. Iba temeimji angateta, ayawara-a arung aser tashidak wara-a arung, shirnokisa tatem tashi arema temeim sayutetter, parnokjiang kümzüktsü ta kasa tapu tekong 13 nung shia aliba angutsü. Aji oda, kodang asenoki aseni meimtsüba purtem dang memeim kümdir, tanüla nung kümdangshidi aser Yisu tanaben arutsü anasa lir ta bilemtetdi.