Temeimba Doctor – Mathi 25:31-40

“Anema alirtem asoshi doctor menüngdak saka shirangertem asoshi doctor tenüngdaktsü.” (Mt. 9:12).
Tsüngremi Pa nübur anema lidaktsütsü asoshi yimya aser sayatenya ajanga mapa inyaker. Laishiba nung mozü teyari menüngdakba kecha nung shia mali.
Dr. Ambrose Pare-i nangzük, “Ni aleptsür, Tsüngremi aneptsür.” Hezekiai jepa sarasademba ainkar Isaia ajanga Tsüngremi nangzük. “Aser Isaiai ashi, Mungozünu amtsük ka agiang. Aser parnoki aji bena arua tepzünu manung ataloka yutsü, aser pa anebadok” (2 Chubatem 20:57). Anebtsü asoshi Mungozünu amshitsü ashibaji ainkari aitsü asü? Mesüra arogo tenzüker asangur yi mozü amshia taneptsü angutsü mesükshi-i toktsü asü? (1 Tim. 5:23).
Tetsürlai taneptsü angutsü asoshi la sen ajak doctor dak indokba aitsü asü? Yisui la maitsü. Pai la süneptsü aser anebtsü (Mk. 5:25-26, 34). Shirangbaji Kibuba nungi temerenshi süra, taneptsüji temulung meyiptsüba. Iba nung Asa chubai tamakok angu. Pa kodang atsünga ao shirang. Temulung meyip. Tsüngrem bushitsü melen pai doctor dang bushi (2 Puti. 16:7-12).
Na tamang nung akanga lira, mozü magibaji junger. Tsüngremi ne tamang agizükang. Saka ozüng (rule) dang nungi sayatenyaji balaka lir. Yisui anogo shia chiyongtsü meshitsü sayu, saka chiyongtsü asoshi alui orr mapa inyaktsü Pai imlar. Teti waroi shi aser tenyartemi amtsük bener arutsütsü nai meimlatsüla! Temeimba Dr. Luke asoshi Tsüngrem tenüng sangang! (Lk. 10:34).
Na atema kanga aria tebilem. Nü dang nungi tesensakba aser timtatemba aika lir. Parnok asoshi aria bilemang. Yisu kangki nung timtema aliba mapang Pai tetsü asoshi bilem (Lk. 2:35; Yn. 19:25-27). Yobi pa tembartem asoshi sarasamdemtsüdang pa tesamaba ajak lepa angu (Yob 42:10). “Shibai sensaker indang bilemtsür pa temoatsüba. Tamajung anogo nung Kibubai pa kümzüktsü. Kibubai pa shirangba yipden nung yaritsü: Pa shirangdang nai pa tashidak ajak aneptsür” (T.Ken 41:1,3). Kibuba nungi maongka angutsü timtem nung alir yariang.