Temeimi tajungtiba bilemer

Temeimi…ajak azüzüker, ajak amanger, ajak yimlar, ajak aremer. 1 Korint 13:7

Temeim tatakzük mali. Temeimi kodanga mashir, “Na talang ka pilaa ogo. Ni tang na meimtsü makok.” “Ajak” tetezü kechisarena dena lir. Khrista mesükba temeimi temulungjang nung tangar dang kecha arendaka mayu maneni meimer. Na anasa alirtem mapa tamajung inyakaka, nai parnok ne temeimi sotta mayur. Parnoka anema kecha tamajung mebilemer.

Temeimi tangar asoshi tajungtiba bilemer. Kari na anema asaa tamajung inyakaka, mapaji asaa inyakba masü ta nai bilemer. Kari na yirutsütsü bushira, nai mapa ajakji aremzüker, tai adoker. Timtem mapang nung teimla agütsüra nai aji agizüker. Kari maneni arütsüra, nai ajakji aremzüker. Nai meimba dak nai kodanga teyimla mesamar. Khristai ne nem agütsüba dak nai maneni kecha jenjang makai meimer.

Pauli ashir, tenem ajungdoktettsüsa pa tamang liaka aji kecha masü, kotak tenyar temeli aser shin o ajak angatettsü sempet liaka, temeim melira aji kecha masü. 1 Korint 13 nung Tsüngremi pei asoshi kecha mebilemi na meimba jungkai adoktsür. Tang iba temeimji na ajanga tangar dang sayutsü Tsüngrem dang sarasademang.