Temeimi tashi angaba bener arur

Shiba den kü ozüng lir, aser aji benshir pai ni meimer: aser shibai ni meimer kübui pa meimtsü, aser ni pa meimtsü aser ni küsasa pa dangi jungkai adoka sayutsü. Yohan 14:21
Tsüngrem ozüng meimbaji ne mulungjang nungi adoker. Kodang nai Tsüngrem dang tashi angatsü timtemdir, ibaji ne mulungjang Tsüngrem nungi pilaba tamaitsü lir. Kari ashir: “Ni Tsüngrem meimer, saka dang tashi angatsü timatemer.” Tanelaren ibaji tamakoktsü. Kari ne dang “Nai Tsüngrem meimer asü?” ta asüngdangra nai yakta langzütsü, “Au ni meimer.” Ne dang, “Nai Tsüngrem dang tashi angadir ma ?” Nai au ni tashi angar ta langzütettsü asü? Temeja Tsüngrem meimbai temulungjang ajunga agi Tsüngrem dang tashi angaba dangi anir. Nai nübutsü dang mapang mapang nung meimra, ne tesendaktepji shidak masü. Tesadang meimba aser tesadang tashi angaba Tsüngremi magizüker.
Temeim medeni tashi angabaji ozüng mapa lir. Pei atema dang tashi angabaji pei sasa tabensa akümba, koba agi asüküm dangi anir. Tekümdang Khristantemi Khrista dang tashi angaba dang nungi parnok taküm nung tazüokba akatsü meranger. Tazüokba jagi Tsüngrem meimba mendenji agitsü makok. Tsüngrem ne temang meshia aliba, ne moral libaliro aser na arogo mapa nung shilem agiba atena oa ne mulungjang repranger.
Ne tekülem tazüngla aser mapang ataktetta ayuba tekülem ka dang akümer asü? Tsüngrem O azüngba metetta arur asü? Ne sarasadem waluk watemba ka dang akümer asü? Idakji ne mulungjang Tsüngrem nungi melenshiba tamaitsü lir. Temeimji Tsüngrem den telungjem akatsü aser Pa tenzüktsü asoshi jangradaktsüba tulutiba lir.