Temeimteper mangatettep adokba ajanga asü:Radha Mohan Singh

New Delhi, July 24 (Agencies): Lalitgate aser Vyapam scam ajanga tera langtsüngi lur aliba mapang, Union Minister of Agriculture Radha Mohan Singh-i, India nung taküm aluyimer nisung 1,400 dak tema asübaji, temeimteper yongtsü nung mangatettep adokba ajanga mesüra pei tashi maitba ajanga lir, ta ashiba ajanga ano Bharatiya Janata Party talila langtsüngleni alur.

Rajya Sabha dang India nung aluyimertem kechi agi yamai asür ta tasüngdangba ka agütsüba nung tezüluba ka ajanga telangzüba agütsüba nung, Singh-i, “Kibong mangatettep, shirang-shiji, temesepba mozü aser chiyungtsü chia-ajemba, kibong akümtsü rongsen magatsütetba, temeim nung mangatettep aser pei tashi maitba ajanga aluyimertem asür, ta National Crime Records Bureau ajanga putetogo,” ta ashi.

Ajisüaka iba telangzüba nung o langzüteptsü pai kecha mesüok.

Pa iba telangzüba agütsüba ajanga opposition kanga mulung masü aser Janata Dal (United) lenir, KC Tyagi-i, iba dak sentakba nung par party-i Agriculture Minister anema ken o benoktsü,” ta ashi.

Congress Speaker aser actor tejen Raj Babbar-i, “Ni bilemer tanga party shingaia aluyimer tem atema BJP-i ama shisatsü tamajung aser tebilemba tamajung mebilemer südi,” ta ashi.

Radha Mohan Singh-i ashiba o ajanga opposition-i parnok amena nokdaktsü maongka tajung ka lapoktsür koba ajanga tang tejembidak ‘land bill’ nunga amshir.