Temelaba melii kiojen yanglutsü memelar: Kohima DC

Dimapur, July 7 (TYO): Kohima Deputy Commissioner, Rajesh Soundararajan, IAS-i Kohima jila aser temeket nung kiojen mashii yangluba ajanga tetsükdaktsü bener arutsüba atema tekümdangtsü tetuyuba kar agütsüogo.
Public-i junga meshisadangi kiojen yangludang kilentzü ayimdak tangbanger, gari lenmang, tetsüng lenmangtem atsünga agir aser talisa disaster management telatetbatem alema yanglur.
Kohima Municipality telongtet nung kiojen mashimashi yangluba, kilentzü ayimdak, tetsüng lenmang aser gari lenmang nung ali aser jana endokbatem azüoktsü atema, tang nungi ki tasen mesüra yanglushitsü atema Kohima Municipal Council (KMC) nungi temelaba meshitsüla, ta Kohima DC-i metetdaktsü.
Maneni, Kohima Municipal Council Administrator-i Nagaland Municipal Act, 2001 nung lateta aliba ama tsünglanglen agüja aliba onüktem mapa küma inyaktsü DC-isa tetuyuba agütsü.
Nagaland Municipal Act, 2001 nung telatetbatem, Rule 264- temelaba melii kiojen meyanglutsü, Rule 278- yimdong merükmejutsü aser jana bendena endoktsü, Rule 287- non-residential tesemtem nungi jana endoktsü, Rule 288- jana mebendentsü atema tenokdangba agütsütsü, Rule 470- NMA, 2001 temzüngtem alema inyakba atema merenshitsü aser Rule 471- sen 2000 tashi senchi achitsü.
Kohima nung kiojen tasen yanglutsü atema temelabaji Kohima Deputy Commissioner ajanga patta reprangshima agizükba sülen ang agütsütsü., ta DC-isa metetdaktsü.