Temelen Tulu

Khrista nung, asenok Tsüngrem temeshibaji akümtsü asoshi, shibai temenen memetet Pa asenok atema Pai temenen kümdaktsü.  -2 Korint 5:21.
Nisung kar Khrista nung lira pa tasen poktetba, tejenbaji süiogo, ajiang ajak tasen kümogo (t.17). Tekong 17-19 nung Yisu Khrista ajanga Tsüngrem den koda putepdaktsü aji angur. Tekong 19ji Pauli züngdangba mesüra nüngloktsüba ama amshi. Item temenentemji parnok nem anema mezüngdang mesüra parnok sentsü mekümdaktsür, saka parnok Tsüngrem den jungtepshidaktsü aser Khrista tongti tenyar kümdaktsü.
Pauli “temelen tulu” indang rasaa ashi. Tsüngrem temenen maliba, tabensa, tarak maketba Pa chir agi aser shirnoki amanger parnok temenen ajak Pa dak enoktsü- tesüiba, tang aser tarutsü. Yisu Khrista, Tsüngrem chiri, Pa tabensa temeshi taküm toktsü aser na aser ni asoshi temenen aküm. Kodang Tsüngremi Pa dak reprang, Tsüngremi asen temenen angu. Laishibai ashir Pai Yisu Khrista daka meranglokteti aküm, anungji Yisu mezüngbuba teti tatem makadak Tebu nungi mezüngbuba bendanga piladang, ayimtena ashi, “Kü Tsüngrem, Kü Tsüngrem, kechiba Nai ni sentoker?” Saka Khristai asen menen abenbaji tesadang dang melentepba liasü. Asen menen den melentepba Pai Pa temeshiba asenok nem agütsü. Tang kodang Tsüngremi asenok dak reprangdir, Pai joko asen menen mangur, saka Yisu tabensa temeshiba angur. Mamangtetba temelentep koda tulu! Ken züluri ashiba ama, “Ni metemsü, saka ni pelar.”
Tsüngrem, Ne taochi yimlibilem asoshi Ne tenüng asanger, kechiaser temenen pur ka ama ni tasütsü langa liasü, kecha agia mamangtetba temelen Nai agütsü.