Temelenshi arutsüla

Taküm election mapang Nationalist Democratic Progressive Party (NDPP) teloki “temelenshi arudagi” ta ayimtena nüboyim tenzük. Aji oda, parnoki ayimtenba amato NPF teloki yimsüsüa aliba NDPP teloki aniba People’s Democratic Alliance government-i melenogo. Temelenshiji yangji tenzüker. Ajisüaka, nübortem asoshi nüngdakba temelenshijibo government melenbaji masü saka yimsüsür mulungjang, jakla yimya aser inyakyim melenshidaktsüner. Atangji, NDPP purtemia kasa tangatetba nung Naga lima nung temelenshi tajung bener arutsü temulungtetba nung iba yimyimji ayimoktsü südi. Yaküm küm tashibo government inyakyim nung nübortem temulung machi kanga liasü. Government-i inyaktsüba mapa kecha nunga asenia pia junger ta ashitsüsa meinyaktet. Government-i gari lenmang tatsükata junga meyanglutetba agi alimai meteta Nagaland kanga nüngkhu bentetogo. Kohima nung Chief minister ki tasenba aser Dimapur nung state stadium kümsülusü merenemtetba den Nagaland tesem balala nung kiojen aser gari lenmang merenemtet yutsüba agi Nagaland kanga akoksadagi. Shitakba agibo longru aser yin amshia yangluba kiojen ya küm 40 tashi dang tashi itta alir, anungji küm 40 sülenbo bendoktsüla. Ajisüaka, Nagaland nungbo ki ka küm ter nunga merenemtetter aser stadium ka küm 20 nunga merenemtetter. Ibaji temenünütsüka aser taaktsüka lir. Item kiojentemji küm ter- metsü agia yangludang küm shia estimate yanglushir aser osettsüset nung jenjang atuba den medemdanga kiojen yanglutsüba sen jenjangjia tutsür, anungji tetenzükdang latetba jenjang dang nungibo noklangben agia tali jenjang yanglushir senbo agizüker saka mapabo merenemer. Mapabo tenzük aser sen jenjangbo küm shia tupettudaktsür agizüka agi saka mapabo merenem aser tebushir mali ta nübortembo kong koma akoksaer memetet akoksadagi. Iba ama inyakyim nung temelenshi arutsüla. Government mapa nunga mapa inyaktsü nüngdakba agi masü saka mapai mao ita sen chia lidaktsütsü asoshi contract nung mesüra adhoc nung yimjak nung memetetdaktsüi miima shimpet shimba ajanga tanübo Nagaland nütsüng aser senotsü anguba jenjang den mesütep ita sen achir aika kümogo. Iba jagi government mapa inyakertem longkak aitba tebilemtsü aiben ajurur. Government mozü kisa tajungba, yangji inyaker ajak tajungtesa, anepdang, anüngdang aser aonung shia chiyongtsü tajung angati angur aser mozü angati agütsür, anungji yipten tajung nung among adena moi nübortem pei alidak angati taneptsü angur ta asütsü melen, government mozü ki aika nung chiyongtsü aser mozü mangubajibo yutsür yipten dena majung aser doctor nurse shitak mali ta asüba tia nung nisung aika anojungi arishi tembangdagi. Government school-tem nung sayur tesayurtemsa tajungba aser kiojena government meyongsa tajungba, anungji government school nung azüngertemisa takok tajungba angur ta asütsü melen, government asü tesayurtem taiar meshitet, tanur tajung aika taküm raksatsüdagi. Kaketreju nung tanurtem taküm tajungba kümdaktsütsü melen raksatsübaji asen lima tarutsü tia raksar ta government aser tesayurtemi angatettsüla. Item maparen nungji temelenshi nüngdaker. Nübortembo bus tejen nung menden tamajung nung mener aodang tyre majungba agi mapang shitak nung tadongtsü ka metongtet timatemer saka yimsüsür aser tulurtembo jenjang tulu aketba foreign car nung dang senzüteper ta asüba asüküm jakla nunga temelenshi nüngdaker. Atangji, government melenaka nisungbo tejen dang, anungji nübortemibo kecha balala temelenshi ataloka mangur. Ajisüaka, government nung alirtemi, nisung tejen süaka, nübortemi mamangtetika pelatsüsa pei dak aketba tashimait jakla yimya aser pei agitsü dang bilemba shisatsü melenshir, Nagaland tasen küma yanglushitsü asoshi apusotsüla. Temelenshiji tamasa pei taküm aser pei shisatsü melenshiba nungi tenzüktsü. Aji oda, kodang pei kija agitsü asoshi rongsen aser tashi bushiba jakla aser shisatsü melenshir külen pei lima aser nübortem ajungtsü asoshi dang bilema inyakdir, temelenshi tajungji tarutsübasa aser iba ama temeleshi kati Nagaland melenshitsü mapang tongogo.