Temelenshi atema nüburtemi shilem agitsü tongtibang: Modi

New Delhi, February 08 (Agencies): New Delhi nung Hombarnü National scheme ka kübok India yimtsüngtem nung inyaker lanur 200 dak tema den shisa lemsatepba mapang Ato kilonser, Narendra Modi-i, yimtsüngtem nung temelenshi adoktsü atema nüburtemi shilem agitsüji kanga tongtibang, ta metetdaktsü.
Prime Minister’s Rural Development Fellows (PMRDF) scheme tajungba benoka inyaktettsü atema shisa lemsateptsü asoshi pai lanurtem ayongzükba den külemi linük yimtsüngtem nung kanga nendaka inyakba atema pai lanurtem dang pelaba lemsatep, ta sorkar sangdong ka ajanga ashi.
(PMRDF) 230 den shisalemsatepba sülen Modi-i, “Hombar nü presentations anguba aser lanurtem dang nungi telangzüba anguba rongnung ‘nüburtemi shilem agibaji tongtibang’ ta asübaji omen ka ama liasü. Temelenshi adoktsü atema iba ya tongtibangtiba asütsü,” ta ashi.
Shilem agir lanur 11-i parnoki tesem tezülen, yimtsüngtem, tribal aliba tesemtem aser Maoist telungpurtemi timtem agütsüba tesemtem nung tetsürtem nem tashi agütsüba, maternal & infant health-care, shisaliok, Swachh Bharat, Ek Bharat-Shreshtha Bharat atema inyakba den külemi aser sorkar maparen nung nüburtemi shilem agiba indang presentation balala agüja liasü, ta sorkar sangdong nungsa metetdaktsü.
Modi den shisalemsatepba mapang shilem agirtemisa North-East state tem nung terenlok, yimtsüngtem nung shisaliok, tribal nübur alidak terenlok mapa, organic farming aser matamabensartem taküm jenjang tajungba atema shisa lemsatep.
PMDRF ya Ministry of Rural Development (MoRD) indang mapatong ka lir aser iba ya state sorkar den sentepa inyaker. September, 2011 küm PMDRF scheme sangdongba sülen iba scheme ‘Fellows’ mezüngbuba batch-ji 2012 küm April ita nung shima liasü.
Tanü Modi-isa ‘Scripting Change’ kaket sayatsü. Iba kaket nung linük nung PMRD Fellow-temi inyaktetba mapatem indang zülua lir.